Bakını toz bürüdü: təhlükədən necə qorunaq?

Ekologiya və Təbii Sərvətlər Nazirliyi Bakı və Abşeron yarımadasında tozun miqdarının sanitar normadan 37 faiz yuxarı olduğunu açıqlayıb. Nazirlik qeyd edib ki, Bakıda və Abşeron yarımadasında müşahidə olunan toza səbəb Ərəbistan yarımadasından daxil olan toz-dumanının atmosferin yuxarı təbəqələrinədək qalxmasıdır.

Havada tozun miqdarının sanitar normadan artıq olması insan sağlamlığına nə kimi ziyanlar vurur və belə şəraitdə insanlar özlərini hansı yolla qoruya bilərlər?

Məsələ ilə bağlı Axar.az-a açıqlama verən tibb elmləri doktoru, professor Adil Qeybulla bildirib ki, fəsadlar olmasın deyə, bu tozun nəfəs yollarına düşməsinin qarşısını almaq lazımdır:

"Bu cür təbiət hadisələrinə mütəmadi olaraq rast gəlirik. Belə məqamlarda bayırda olan insanların tibbi maska ilə gəzməsi, məcburi olmadığı halda isə açıq havaya çıxmamaq məsləhətdir. Düzdür, belə hava şəraiti uzun müddət davam etməyəcək, amma bu müddətdə hava ilə təması azaltmaq yaxşı olardı. Xüsusilə də hamilə qadınlar, yaşlılar və uşaqlar orqanizmlərini qorumaq üçün bunlara əməl etməlidirlər. Belə hadisələr zamanı KİV vasitəsilə əhalini maarifləndirmək lazımdır".

Telegramda izləyin

instagramda izləyin