Prezidentin işdən çıxardığı icra başçısı Elmar Vəliyev kimdir?

Xəbər verdiyimiz kimi, Prezident İlham Əliyev E.R.Vəliyevin Gəncə Şəhər İcra Hakimiyyətinin başçısı vəzifəsindən azad edilməsi haqqında sərəncam imzalayıb.

Sonxeber.az xəbər verir ki, sərəncama əsasən, Vəliyev Elmar Rüstəm oğlu Gəncə Şəhər İcra Hakimiyyətinin başçısı vəzifəsindən azad edilib.

E.Vəliyev bu vəzifəyə prezidentin 2011-ci il tarixli sərəncamına əsasən təyin edilmişdi.

E.Vəliyev 1960-cı ildə Azərbaycan Respublikasının Yevlax şəhərində anadan olub.
1979-cu ildən 1986-cı ilə qədər Azərbaycan Texnologiya Universitetində təhsil alıb, mühəndis-texnoloq ixtisasına yiyələnib.1997-ci ildə Bakı Dövlət Universitetinin Hüquq fakültəsinə daxil olub və 2001-ci ildə həmin fakültənin məzunu olub.

Əmək fəaliyyətinə 1982-ci ildən Yevlax şəhər yol tikinti idarəsində başlayıb. 1983-cü ilə qədər bu müəssisədə təmirçi vəzifəsində çalışıb.
1983-cü ildən əmək fəaliyyətini Gəncə Tikiş Fabrikində davam etdirib və 1989-cu ilədək həmin fabrikdə mühəndis vəzifəsində işləyib.
1989-cu ildən 1994-cü ilə qədər Azərbaycan Respublikası Həmkarlar İttifaqı Mərkəzi Komitəsində təşkilatçı vəzifəsində işləyib.
1990-cu ildən 1995-ci ilə kimi Yevlax Şəhər Sovetinin deputatı olub.
1994-cü ildən 2001-ci ilə qədər Yevlax Rayon Gömrükxanasının rəisi vəzifəsində, 2001-ci ildən 2004-cü ilə qədər isə Azərbaycan Dövlət Gömrük Komitəsinin rəis müavini vəzifəsində işləyib.
2004-cü ildən 2011-ci ilə kimi Yevlax Şəhər İcra Hakimiyyətinin başçısı olub.
Azərbaycan Respublikası Prezidentinin 18 fevral 2011-ci il tarixli sərəncamına əsasən Gəncə Şəhər İcra Hakimiyyətinin başçı vəzifəsinə təyin edilmişdi.

Yeni Azərbaycan Partiyasının üzvüdür.

Ailəlidir, üç övladı var.

Qeyd edək ki, icra başçısı vəzifəsindən azad edilən Elmar Vəliyev 2018-ci il iyulun 3-də, saat 20.30 radələrində mühafizəçisi Qasım Aşbazov ilə birgə İcra Hakimiyyətinin inzibati binasının qarşısında naməlum şəxsin odlu silahdan açdığı atəş nəticəsində müxtəlif dərəcəli bədən xəsarətləri alıb və xəstəxanaya yerləşdirilmişdi.

Hazırda icra başçısının vəziyyəti qənaətbəxş hesab olunur.

Telegramda izləyin