Sürət həddinə görə kameralar vasitəsilə cərimə yazıla bilər? - Yol polisindən AÇIQLAMA

Son bir neçə ildir yollarda quraşdırılan xüsusi texnikalar sürət həddini aşan avtomobilləri qeydə alır, sürücülər barəsində elekton protokol tərtib olunur. Bu, əsasən, radarlar vasitəsilə gerçəkləşir.

Maraqlıdır ki, bəzi sürücülər müşahidə kameraları vasitəsilə də onlara cərimə yazıldığını bildirirlər.
Sürət həddi kameralar vasitəsilə müəyyən edilə bilərmi? Yol polisi müşahidə kamerasına əsaslanıb, sürücünü sürət həddini aşdığına görə cərimələyə bilərmi?

Məsələ ilə bağlı modern.az-a danışan Baş Dövlət Yol Polisi İdarəsinin İctimaiyyətlə Əlaqələr Şöbəsinin rəisi, polis polkovnik-leytenantı Rüfət Quliyev deyib ki, avtomobillərin sürəti aşması xüsusi texnika vasitəsilə qeydə alınır.

"Yollarda xüsusi texnikalar vasitəsilə nəqliyyat vasitələrinin sürəti ölçülür. Hər hansı bir qayda pozuntusu baş verərkən nəqliyyat vasitəsinin sürücüsü barədə dərhal elektron qərar tərtib olunur. Müəyyən müddətdən sonra kağız daşıyıcıda və ya SMS vasitəsilə sürücüyə məlumat verilir. Hansısa bir qayda pozuntusu olarsa, bu 3 qaydada - kağız daşıyıcıda yaşadığı ünvana, SMS vasitəsilə mobil telefona və sürücünün yaratdığı elekton kabinetə yerləşdirilərək, ona çatdırılır. Yolda polis saxlayıb bu barədə məlumat verirsə, burada heç bir qanunazidd hərəkət yoxdur. Sürücü elekton kabinetini diqqətdə saxlamalıdır. Əgər sürücü ona qarşı doğru qərar qəbul edilmədiyini düşünürsə, Dövlət Yol Polisinin "902 qaynar xətti"nə və ya Daxili İşlər Nazirliyinin "102 qaynar xətti"nə zəng vurub şikayət edə bilər. Şikayətlər araşdırılandan sonra ona məlumat veriləcək".

Hüquqşünas Ərşad İbrahimov deyib ki, sürət rejiminin pozulması yalnız radar və kamera ilə qeydə alınıb elektron qərar ilə rəsmiləşdirilə bilər.

"Sürücü sürət rejimini pozub deyə yol polisi onu saxlayıb cərimələyə bilməz, qanun bunu qadağan edib. Sürət həddinin aşılması ilə bağlı qayda pozuntusu mərkəzi sistem vasitəsi ilə qeydə alınır, sürücüyə göndərilir. Yol polisi sürət həddini aşan sürücünü saxlaya bilər, bəlkə sürücü sərxoşdu və ya başqa problem var, amma sürət həddini aşdığına görə cərimə yaza bilməz".

Telegramda izləyin