"Müasir ailə əbədi birlik ideyasından uzaqlaşaraq, son istifadə tarixi olan bir müqaviləyə çevrilməkdədir" - AÇIQLAMA

Müasir dövrdə ailə institutunun zəifləməsinin altında bir yox, bir neçə ciddi səbəb yatmaqdadır. Bəs bu səbəblər nələrdir?

Sosioloq Yusif Nəbiyev bu barədə Sonxeber.az -a danışıb:

"Bunları sıralayacaq olsaq, ilk növbədə qloballaşma fonunda fərdiyyətçi, materialist qərb dəyərlərinin yayılması və yerləşməsini qeyd edə bilərik. Fərdi azadlıq və zövqlərin ictimai norma və öhdəliklərdən daha öndə durduğu şəraitdə insanların ailəni sabit sosial institutdan daha çox müvəqqəti razılaşma kimi görməsi xoş mənzərə olmasa da başa düşüləndir.

Üstəlik, müasir insan artıq həyatını hazır ssenarilərlə deyil, fərdi və situativ qərarlarla qurur. Ailə də bu fonda "məcburi struktur" kimi yox, istənilən vaxt ləğv edilə bilən elastik bir müqavilə kimi qəbul olunur.

Digər mühüm səbəblərdən biri cinsəlliyin "outsource" edilməsidir. Təəssüf ki, porno sektoru, ifrat açıq-saçıqlığı normaya çevirən film, reklam, musiqi industriyaları qadın bədənini kişi üçün olduqca əlçatan, adi bir şeyə çevirir. Eyni formada sosial şəbəkələr qadınlara da istədikləri qədər kişiyə öz gözəlliklərini nümayiş etdirmə imkanı verir. Belə bir şəraitdə nə ər arvadına, nə də arvad ərinə cinsi yöndən möhtac və bağlı olmur. Fərqli alternativlərin ifrat bolluğu ailənin önəmli sementlərindən biri olan cinsəlliyi ailənin monopoliyasından çıxarır.

Deyilənlərə paralel olaraq iqtisadi qeyri-sabitlik də ailənin təməllərini zəiflədən amillər arasında yer alır. Gəlir qeyri-müəyyənliyi, mənzil problemi, uzunmüddətli plan qura bilməmək ailəni qoruyucu mexanizm olmaqdan çıxarır və hətta bir çox insan üçün əlavə stress mənbəyinə çevirir. İnsanlar artıq ailəni təhlükəsizlik təminatçısı kimi yox, əlavə məsuliyyət kimi görürlər.

Kobud formada desək, müasir ailə əbədi birlik ideyasından uzaqlaşaraq, son istifadə tarixi olan bir müqaviləyə çevrilməkdədir".

Telegramda izləyin