Uşaq tanımadığı kasıb qıza hədiyyə göndərdi - 14 il sonra evləndilər - FOTOLAR

Bəzən insanın kiçik əməlləri gözləmədiyi anda böyük sürprizlərə çevrilir.

BiG.AZ-ın oxuculara təqdim etdiyi romantik həyat hekayəsi bunun bir nümunəsidir.

Belə ki, ABŞ-ın Aydaho ştatının sakini Tayler Vulf 7 yaşında olarkən (2000-ci ildə) kasıb ölkələrdə yaşayan uşaqlara Milad hədiyyəsi göndərən xeyriyyə təşkilatının aksiyasında iştirak edərək filippinli kasıb bir qıza hədiyyə göndərib.

14 il sonra həmin qıza aşiq olacağından xəbərsiz olan balaca Tayler hədiyyəsini ayaqqabı qutusuna qoyaraq, qutunu kağızla "cildləyib", bağlamanın kimə çatacağını bilmədən içinə təbrik açıqcası və öz şəklini də qoyaraq, hədiyyəsini göndərib.

Bu əməlini unutsa da, Filippində yaşayan Coanna Marşan onu unutmayıb.

Hadisədən 11 il sonra Coanna sosial şəbəkədə Tayleri taparaq "dostluq" göndərib. Tayler ilk öncə dostluğu qəbul etməyib, lakin qız israr etdikdə, "bəlkə də bir sinifdə oxumuşuq" düşünən oğlan "təslim olub".

Coanna Taylerin uşaqlıq şəklinin onda olduğunu və hədiyyəsini hələ də qoruyub saxladığını dedikdə, oğlan heyrətə gəlib.

Bir neçə ay ünsiyyətdə olduqdan sonra zövqləri, maraqları, fikirləri üst-üstə düşən gənclər yaxın dosta çevriliblər.

Bir müddət sonra Coanna Tayleri Filippinə qonaq çağırıb. Qızı canlı surətdə görən Tayler aşiq olduğunu anlayıb. O, qızın valideynləri və dostları ilə tanış olaraq, öz qohumlarını da Coanna ilə tanış edib.

ABŞ-a qayıtdıqdan sonra artıq Coannadan ayrı qala bilmədiyini hiss edən Tayler Filippinə növbəti səfərində qıza evlənmək təklifi edib.

Sevgililər 2014-cü ildə ailə qurublar.

Bir il sonra onların oğlan uşağı dünyaya gəlib.

Hazırda Tayler və Coanna xoşbəxt valideynlərdirlər.

Tayler uşaqlıqda həmin aksiyada iştirak etməsəydi, yaxud sosial şəbəkədəki "dostluğu"nu qəbul etməsəydi, və ya Filippinə yollanmasaydı nə olacağını təsəvvürünə də gətirə bilmir. Bunları etməsəydi, o, həyatının sevgisini tapmayacaqdı.

Tayler əmindir ki, kiçik xeyir iş belə, insanı daha gözəl edir və gec-tez ona qayıdır.

Telegramda izləyin