"Facebook" da şər- böhtan yazanlar qanunla cəzalandırıla bilər- AÇIQLAMA

Məlum olduğu kimi sosial şəbəkələrdə tanınmış simalara, xüsusən də elmi və siyası fəaliyyətlə məşğul olan şəxslərə qarşı "söyüş" kampaniyaları həyata keçirilir.
Həmin şəxslərin müxtəlif Facebook səhifələrində şəkilləri, görüntüləri yayılaraq, əxlaqsız şəkildə təhqir edilir. Yaxud da şərh bölümündə təhqir dolu fikirlər yazılır. Bu hal kütləvi tendensiya halını alıb.

Maraqlıdır, Facebook şəbəkəsində belə halları tənzimləmək üçün yeni qanun yaradıla bilər və kimlər cəzalandırıla bilər?

Bununla bağlı Sonxeber.az-a deputat Elman Nəsirov danışıb:

"Sosial şəbəkələr dövrümüzün reallığıdır. Sosial şəbəkələrin olması hesab edirəm ki, vacibdir. Bu demokratiyanın elementidir. Sadəcə söhbət ondan gedir ki, bu sahə qanunla tənzimlənməlidir. Bütün sferalar qanunla tənzimlənir. Yeganə qanunla tənzimlənməyən sahə varsa, o da sosial şəbəkələrdir.

Sosial şəbəkə olduqca əhəmiyətli rol və missiyanı həyata keçirir. Orada elə məsələlər qabardılır ki, ictimai diqqət ora yönəlir. Sosial şəbəkələr nəzarət funksyasını həyata keçirir.
Bütün sahələr necə dövlət tərəfindən qanunla tənzimlənir, hesab edirəm ki, sosial şəbəkələrlə bağlı qanuna da ehtiyac var.

Burada hər şey qanunla tənzimlənsin, qanundan kənar olan hallara hüquqi müstəvidə qiymət verilsin. Türkiyədə sözügedən platforma ilə bağlı qanun artıq qəbul olunub. Bir çox ölkələrdə bu istiqamətdə işlər gedir.

Yeri gəlmişkən qeyd edim ki, Türkiyənin təcrübəsindən də istifadə edib bu sahədə konkret addım atmaq olar".

Deputat bildirib ki, bir insanın real aləmdə şərəf və ləyaqətini alçaldanda, işgüzar nüfuzuna xələl gətirəndə, şər- böhtan atanda hansı cəzalar nəzərdə tutulursa, eyni cəzalar da virtual aləmdə olmalıdır:

"Şər- böhtan yolunu düşünən insan düşünməsin ki, bunu real həyatda edəndə cəzəlanaram, qoy bunu virtual aləmdə edim. İnsan belə bir düşüncəyə qapılmamalıdır. Həmin insanlar bilməldir ki, qanuna zidd addımlar atanda cəzalandırıla bilər".

Şəlalə Babayeva

Telegramda izləyin

instagramda izləyin