Erməniləri dəstəkləyən yazıçı Elif Şafak kimdir? - DOSYE
Xəbər verdiyimiz kimi, Azərbaycanda çoxsaylı oxucusu olan və kitabları şəhərin bütün kitab mağazalarında satılan məşhur türk yazıçı Elif Şafak şəxsi "Twitter" hesabından Ermənistana dəstək məqsədli paylaşım edib.
Erməni müğənni Simon Mağakyanın Şuşa kilsəsindəki ifasını paylaşan Şafak HDP-nin erməni əsilli deputatına təşəkkür edib.
Elif Şafakın bu addımı azərbaycanlı oxucular tərəfindən etirazla qarşılanıb. Artıq Azərbaycanın bir çox kitab mağazaları ona qarşı boykot elan edib, "Libraff", "BookZone", "Kitabevim.az", "Libraff" və "Ovod" mağazalarının bütün filialları Elif Şafakın kitablarının həm satışını, həm də tərcümələrini dayandırıblar. Bu barədə mağazalar sosial şəbəkələrdəki hesablarında məlumat yayıblar.
Bəs onun türkçülüyü təhqir etdiyi romanına görə məhkəməyə verildiyini və gey və lesbiyanların hüquqlarını müdafiə etdiyini bilirdinizmi?
Sonxeber.az BiG.AZ-a istinadən Elif Şafak haqqında və həmin roman barəsində oxucuları məlumatlandırmaq istəyir.
Elif Şafak kimdir?
İngilis-türk yazarı olan Elif Şafak 25 oktyabr 1971-ci ildə Fransanın Strasburq şəhərində anadan olub. Atası Nuri Bilgin, anası Şafak Ataymandır. O, uşaq olarkən valideynləri boşanıb və anası Elifi tək böyüdüb. Anası diplomat olduğu üçün uşaqlıq və gənclik illərini müxtəlif ölkələrdə keçirib. Ankaradakı Kubilay İbtidai məktəbində təhsilinə başlayan Şafak orta məktəbə Madriddə gedib, lisey təhsilini isə Ankara Atatürk Anadolu Liseyində alıb. Ali təhsilini Orta Şərq Texniki Universitetinin Beynəlxalq Münasibətlər fakültəsində başa vurub. Eyni universitetdə magistr və doktorantura təhsilini alıb.
2003-2004 tədris ili ərzində Michigan Universitetində dosent olaraq mühazirələr oxuyub. Hazırda Arizona Universitetində Yaxın Şərq Araşdırmaları dosentidir. "Ədəbiyyat və sürgün", "Yaddaş və siyasət", "Müsəlman dünyasında cinsəllik və ictimai cinsiyyət" mövzusunda mühazirələr oxuyur və Türkiyədə gündəlik və aylıq müxtəlif nəşrlər üçün yazmağa davam edir.
"Referans" qəzetinin baş redaktoru Əyyub Can Sağlıkla ailə quran Şafakın 2006-cı ildə Şehrazat Zelda adlı qızı dünyaya gəlib.
Elif Şafak 2005-2009-cu illərdə "Zaman" qəzetində yazıçı olaraq işləyib.
Türk və ingilis dillərində yazan Şafakın 11-i roman olmaqla 18 kitabı nəşr olunub. Əsərləri 54 dilə tərcümə edilib.
2005-ci ildə "Məd Cəzir" ("Med Cezir") adlı kitabında qadınlar, şəxsiyyət, mədəni bölünmə, dil və ədəbiyyatla bağlı yazılarını bir araya gətirib. Elə həmin il "Referans" qəzetinin baş redaktoru Əyyub Can Sağlıkla Berlində ailə qurub.
2006-cı ildə nəşr olunan "Ata və bic" ("Baba ve Piç") romanını ingilis dilində qələmə alıb. Türkiyə-Ermənistan münasibətlərini araşdıran bu romana görə türkçülüyü təhqir etdiyi səbəbi ilə ona qarşı məhkəmə iddiası qaldırılsa da, Elif cinayətin hüquqi elementlərinin mövcud olmadığını və heç bir dəlilin olmadığını irəli sürərək bəraət qazanıb.
Həmin il qızı Şehrazat doğulduqdan sonra ingilis dilində yazdığı "Qara süd" ("Siyah Süt") avtobioqrafik romanında doğuş sonrası depressiyasından danışıb.
İki il sonra oğlu Əmir Zahiri dünyaya gətirib və ikinci dəfə ana olub.
2009-cu ilin mart ayında nəşr olunan "Eşq" ("AŞK") romanı türk ədəbiyyatı tarixində ən qısa müddətdə ən çox satılan ədəbi əsər olub.
2009-cu ilin sonunda səkkiz romanından və ilk oçerk kitabı olan "Məd Cəzir" ("Med Cezir") əsərindən bəndləri seçib bir araya gətirərək "Kağız Halva" ("Kağıt Helva") adlı kitabını nəşr etdirib.
2010-cu ilin Noyabr ayında "Fəraripərəst" ("Firarperest") kitabı çap olunub. Əsərdəki illüstrasiyalar M. K. Perkerə aiddir.
2011-ci ildə "İsgəndər" ("İskender") adlı əsəri yayımlanıb. Kitabın üz qabığında makiyajla kişiyə "çevrilmiş" Elif Şafakın öz şəklidır.
Sənətçinin Türkiyə qəzetləri üçün yazdığı köşə yazılarından ibarət "Şemspare" adlı kitabı 2012-ci ildə işıq üzü görüb.
2013-cü ildə "Ustam və mən" ("Ustam ve Ben") romanı nəşr olunub.
"Sevginin qırx qaydası" ("The Forty Rules of Love") adlı romanı BBC-nin reytinqində dünyamızı formalaşdıran 100 romandan biri olub.
"Bu qəribə dünyada 10 dəqiqə 38 saniyə" (10 Minutes 38 Seconds in this Strange World ) adlı son romanı "Booker" və "RSL Ondaatje" mükafatlarına layiq görülərək Blekvellə görə İlin Kitabı (Blackwell’s Book of the Year) seçilib.
Siyasi Elmlər doktoru dərəcəsini alan Şafak fəxri üzvü olduğu Oksford Universitetinin Müqəddəs Anna Kolleci də daxil olmaqla, Türkiyə, ABŞ və İngiltərənin müxtəlif universitetlərində dərs deyib.
"Weforum" Qlobal Kreativ İqtisadiyyat Gündəm Şurasının üzvü və ECFR (Avropa Xarici Əlaqələr Şurası) qurucularından biridir.
Qadın hüquqları, LGBT hüquqları və söz azadlığı müdafiəçisi olan Şafak həmçinin motivator kimi də fəaliyyət göstərir və iki dəfə "TED Global"da çıxış edib.
Şafak bir çox digər mükafat və titullarla təltif olunub və bir çox ədəbi müsabiqələrdə münsiflər heyətinin üzvü olub, lakin çox heyif ki, Azərbaycana qarşı insaflı ola bilməyib...
Natəvan Baxşiyeva
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş