"Ali Baş Komandanın adı Azərbaycan tarixinə qızıl hərflərlə yazılacaq" - Deputat

"Noyabrın 8-də Ali Baş Komandan ulu öndər Heydər Əliyevin və Zərifə xanım Əliyevanın məzarını tək qalib ölkənin lideri kimi deyil, həm də atasının vəsiyyətini uğurla icra edən övlad kimi ziyarət etdi".

Bu sözləri Sonxeber.az-a deputat Cavanşir Paşazadə deyib.

Deputat qeyd edib ki, sentyabrın 27-dən bu günə kimi biz tarixi günlər yaşayırıq:

"Düşmənin 30 ildə qurduğu istehkamlar və topladığı güc 1ayda yerlə yeksan olundu. İşğalçı Ermənistanın xeyli sayda canlı qüvvəsi, hərbi texnikası məhv edilib və ya qənimət kimi götürülüb. Qısa bir zamanda Şuşa, Füzuli, Zəngilan və digər işğalda olan torpaqlarımızın bir qismi azad edilib. Azad etməkdə də davam edirik. Ali Baş Komandanın adı Azərbaycan tarixinə böyük sərkərdə, güclü lider kimi qızıl hərflərlə yazılacaq. Bu gün bütün təzyiqlərin qarşısında qətiyyətlə dayanan cənab Prezident tək cəbhədə deyil, həm informasiya, həm də diplomatik sahədə qalib gələn müdrik şəxsiyyət, güclü sərkərdədir".

Deputat vurğulayıb ki, uğurla davam edən Vətən müharibəsi Azərbaycan xalqını bir yumruq kimi Ali Baş Komandanın və ordumuzun ətrafında sıx birləşdirib:

"Cənub bölgəsinin qəhrəman oğulları da bu savaşda aktiv iştirak etməkdədirlər. Tək cənub deyil, bütün bölgələrdən olan igidlərimiz ərazi bütövlüyümüz uğrunda canlarından, qanlarından keçirlər. Bu gün hamımız qarabağlı, şuşalı, kəlbəcərli, zəngilanlıyıq. Tək amalımız var, o da bütün torpaqlarımızı işğalçılardan təmizləyib, soydaşlarımızı doğma dədə-baba yurdlarına qovuşdurmaqdır. Bu bizim hər birimizin mənəvi borcudur. Əminəm ki, tezliklə bütün torpaqlarımızda Azərbaycanın bayrağı dalğanacaq. Hamımız Şuşaya gedib xarıbülbülün ətrini duymağa səbirsizlənirik. Bu qürurverici anları bizə yaşatdığı üçün başda Ali Baş Komandan İlham Əliyev olmaqla Azərbaycanın şanlı ordusuna təşəkkür edirəm. Qarabağ bizimdir, Qarabağ Azərbaycandır!"

Aysel Yusifqızı

Telegramda izləyin