"Yoldaşımın burnunu kəsib, ÇƏNGƏL ilə qızıl dişlərini çıxart DEDİLƏR" - DƏHŞƏT saçan Xocalı FACİƏSİ

Xocalı hadisələrinə canlı şahidlik edənlər arasında təəssüf ki, çoxlu qadın da var. Onlardan biri də Məlahət Hüseynovadır.

Sonxeber.az Xocalı sakini Məlahət xanımın faciə zamanı yaşadıqlarını izləyicilərə təqdim edir:

"Xocalı faciəsi elə bir faciədir ki, o heç vaxt yaddaşlardan silinməz. O həyacanı yaşayan insan olanları unudarmı? Heç zaman!

İndi o qədər ağlamışam ki...25 fevral axşamı ermənilər 4 tərəfdən Xocalıya hücuma keçdi. Biz hücumdan qorunmaq üçün zirzəmilərə sığınmışdıq. İnsanlar xəstəxanaların, məktəblərin, bağçaların, kim hansı əraziyə yaxın idisə, oradakı zirzəmilərində gizlənirdi. Evin zirzəmisində qalmağa qorxurduq.

Sol tərəfdən, ürək nahiyəmdən, omba hissəsindən snayper gülləsi dəymişdi. Xəstəxanada olduğumu bir aydan sonra bildim. Bədənimdə qan qalmamışdı. Gecə atışma düşəndə biz meşəyə qaçdıq. Mən qarşı tərəfə keçmək üçün Qarqar çayına girdim. Bir oğlum vardı deyə onu boynuma aldım, qızın birini arxadan kürəyimə, birini də qucağıma alıb çaya girdim. Digər qızım isə əsir düşən bibisinin yanında idi. Çaydan çıxandan sonra paltarlarımızı soyunub atdıq ki, ayaqlarımız donmasın. Ayaqyalın vəziyyətdə qarla addımladıq. Ermənilər hazırlıqlı idi. Onlar tarixdə bağışlanılmaz iz qoydular, elə bir faciə törətdilər ki, Allah da onları bağışlamaz.

Ermənilər hazır vəziyyətdə, səngərin içində bizi gözləyirdilər. Onlar insanları kütləvi atəşə tutan zaman güllə arxadan qızım Marala dəydi və sinəsindən qan axmağa başladı. Vəziyyəti belə görüb qızımın yanında oturdum ki, gəlsinlər məni də öldürsünlər. Qızımı daşın üzərinə uzandırdım, iki dəqiqə sonra üzünü örtmək üçün əyiləndə mənə də güllə dəydi. Bədənim rezin kimi yığılıb-açıldı. Qan məni apardı. Uşağın meyitinin yanına düşüb qalmışam. Mən huşumu itirdim deyə, heç nədən xəbərim olmayıb. Rəhmətlik Əlif Hacıyev 12 uşağı Ağdama keçirəndə o biri uşaqları da özü ilə aparıbmış. Oğlumun yolda yanında tank partlamışdı deyə paralic keçirmişdi. Elə o vaxtdan da oğlum ikinci qrup əlildir. Uzun illər xəstəxanalarda olub.

Omba sümüyümə pulemyot gülləsi dəyib, bu nahiyəmi parçalamışdı. Hələ də sağlamlığımda problemlər var. Ermənilər əsirlikdə qalan yoldaşıma işgəncələr verib, ona demişdilər ki, çəngəl ilə qızıl dişlərini çıxart bizə ver. Sonra ağzının üzərinə təpiklə elə vurmuşdular ki, zərbənin təsirindən ağzında bir dişi salamat qalmamışdı. Daha sonra burnunu kəsmişdilər, qulağını kəsmək istəyəndə isə ermənilərdən biri yeni azərbaycanlı əsirlərin gəldiyini dediyi üçün yoldaşımı buraxmışdılar".

Şəlalə Babayeva

Telegramda izləyin

instagramda izləyin