Ermənistan revanş istəyir? - Sərhəddə baş verən hadisəylə bağlı AÇIQLAMA

Xəbər verdiyimiz kimi, dünən Gorus-Qafan yolunun Qubadlı rayonunun Aşağı Cibikli kəndi yaxınlığından keçən hissəsi istiqamətində yerləşən Dövlət Sərhəd Xidmətinin Sərhəd Qoşunlarının "Qubadlı" əlahiddə sərhəd diviziyasının sərhəd-döyüş məntəqəsinin ərazisində xidmətdə olan əsgər Şirəliyev Ruslan Nəriman oğlu Ermənistan Silahlı Qüvvələrinin 2 hərbi qulluqçusunun qəfil hücumuna məruz qalıb və əlbəyaxa döyüş zamanı sinə nahiyəsindən süngü bıçaqla yaralanıb. Sərhəddə baş verən bu tip provokativ hərəkətlər Ermənistan tərəfinin bir daha sülhə meyilli olmadığının, revanşist fikirlərlə yaşadığının sübutudur.

Məsələ ilə bağlı Sonxeber.az saytına açıqlama verən politoloq Qabil Hüseynli bildirib ki, Rusiyanın proseslərə seyirci münasibət bəsləməsi erməniləri "ruhlandırır" və nəticədə sərhəddə belə xoşagəlməz hadisələr baş verir:

"Proses belədir ki, Rusiya imzalanmış üçtərəfli müqavilədə özünün siyasi iradəsini ortaya qoymur, proseslərə ciddi müdaxilə etmir. Əvvəllər "əl altından", indi də açıq formada bunu edir. Rusiya Ermənistanı silahlandırır, ordusunu yenidən qurur, modernizə edir. Rusiya onsuz da avantürist xarakterli erməniləri yeni avantüralara sövq edir. Baş verənlər də həmin avantüralardan biridir. Nikol Paşinyanın ritorikasındakı həmin o sülh çağırışlarının hamısı yalan söz-söhbətlərdir. Ermənilər sülh müqaviləsinin imzalanması yolunda ciddi addımlar atmırlar, atmaq da istəmirlər".

Rafi Müslümov

Telegramda izləyin