"Patı"nın ilk istifadəsində insan intihar edə bilər" - Ekspertdən AÇIQLAMA

Azərbaycan dilində "patı" adı ilə tanınan metamfetamin narkotik və hallüsinasiya xüsusiyyəti olan sintetik maddədir. Bir çox narkotik maddə kimi 6-24 saat davam edən güclü eyforiya, asılılıq yaratma qabiliyyətinə malikdir. Tərkibi cəhətdən amfetaminə yaxın psixoaktiv maddədir.

Son aylar adı dildən düşməyən bu narkotik vasitə haqqında narkomaniya üzrə ekspert Emil Maqalov Sonxeber.az-a bildirib ki, kimyəvi narkotik olan bu maddə 1 əsr əvvəl icad olunub:

"Birinci, eyni zamanda İkinci Dünya müharibəsində bu maddə həm zəhər kimi, həm işgəncə vermək üçün, həm də kamikadzelərin ağlını başından almaq niyyəti ilə istifadə olunub. Amma Azərbaycanda metamfetamin 5 ildən çoxdur ki, yayılıb. Son dövrlərdə insanların daha çox məlumatlanması sizin, bizim bunu cəmiyyətə çatdırmağımızın, informasiyanı yaymağımızın nəticəsidir.

Amma onu da qeyd edim ki, hər kəs öz meyili ilə buna qurşanır. Heç kimə məcburi verilmir. Narkotik ucuz bir şey deyil ki, onu paylasınlar. Narkotik satanın qanundan başqa heç bir problemi yoxdur. Onun müştərisi yetərincədir. Uşaqlara paylanması barədə məlumatlar yayılıb. Amma uşaqlara yaymaqda nə məqsəd ola bilər ki? Uşaqları niyə öldürsünlər? Düzdür, onların məqsədi pul qazanmaqdır, kim ölür ölsün. Lakin hazırda vəziyyət bu həddə deyil, bununla rastlaşmamışam.

Hətta narkotacir lazımi miqdarda tapmadığı üçün narkotik maddələri bütün müştərilərinə çatdıra bilmir. O səbəbdən bunu pulsuz paylaya bilməzlər. Bəli, narkotiklər çox böyük təhlükədir. Amma uşaqlar arasında, bağçalarda, məktəblərdə satıldığı barədə məlumatlar səhvdir. Sadəcə daim yer dəyişdirdikləri üçün məktəbin qabağında satmaqları mümkündür. Hazırda ölkəmizdə bu halların qarşısının alınması üçün güclü tədbirlər görülür. Daxili İşlər Nazirliyinin əməkdaşları tərəfindən ölkə daxilində narkotik vasitələrin satışı ilə məşğul olan şəxslər saxlanılaraq məsuliyyətə cəlb edilir. Narkotik və psixotrop maddələrin dövriyyəsi ilə bağlı aparılan mübarizə çərçivəsində onların mənfi təsiri ilə bağlı da təbliğat işləri həyata keçirilir".

Ekspert qeyd edib ki, istifadə edən şəxs ilk dəfədən pis hala düşə bilər:

""Patı"nın ilk istifadəsində insan intihar da edə, özünə və ya başqa birinə xətər yetirə bilər. Bu maddənin həzzi yoxdur, insanı sadəcə dəli etmək üçündür və şizofreniya yaradır. Mənim qeyri-hökumət təşkilatımda Səhiyyə Nazirliyinin "Riskin azaldılması" layihəsinin çərçivəsində pulsuz, təmənnasız əvəzedici terapiya, tibbi metodonla müalicə var. Bununla bağlı sosial şəbəkələrdə müraciətlərim var. Amma bura köhnə narkomanlar bəzi şərtlərlə qəbul olunurlar. Həmin şəxs narkoman kimi qeydiyyatda olmalı, mütləq əvvəllər narkodispanserdə uğursuz müalicə almış olmalı və yaxud onda vərəm, QİÇS kimi hər hansı bir ağır xəstəliklər olmalıdır ki, mən onları layihəyə götürüb metadon proqramına qoşa bilim".

Aysel Səfərzadə

Telegramda izləyin