"İllər keçsə də, hər bir şəhidin əziz xatirəsi xalqımızın qəlbində yaşayacaq" - Nəsib Məhəməliyev

Xəbər verdiyimiz kimi, sentyabrın 27-də Vətən müharibəsinin başlamasının biri ili tamam olur. Qeyd edək ki, Azərbaycan Respublikası Prezidenti İlham Əliyevin 2 dekabr 2020-ci il tarixli Sərəncamına əsasən, Vətən müharibəsində qəhrəmancasına döyüşmüş, ölkəmizin ərazi bütövlüyü yolunda canlarını fəda etmiş əsgər və zabitlərimizə, bütün şəhidlərimizə dərin ehtiram əlaməti olaraq, hər il sentyabrın 27-i Azərbaycanda Anım Günü kimi qeyd ediləcək.

Bununla bağlı Sonxeber.az-a danışan deputat Nəsib Məhəməliyev bidirib ki, 30 il işğalda olan Qarabağ və onun ətraf rayonlarının azad olunması uğrunda 44 günlük ölüm-dirim mübarizəsi ötən ilin sentyabr ayının 27-də cənab Prezident, Ali Baş Komandan İlham Əliyevin Azərbaycan əsgərinə "İRƏLİ!" əmrini verməsi ilə başlayıb:

"Vətən müharibəsində 200 il ərzində itirdiklərimizi Ali Baş Komandanımızın, müzəffər Azərbaycan ordusunun, əsgərlərimizin, verdiyimiz minlərlə şəhidlərimizin, sağlamlığını itirən qazilərimizin hesabına torpaqlarımızı azad edərək geri qaytardıq.

Ötən bir il ərzində biz gərgin, eyni zamanda çox şərəfli anlar yaşadıq. Hər gün milyonlarla insan şəhidlərimizə rəhmət oxuyur, onların xatirəsini əziz tutur. Dövlətimiz tərəfindən şəhid ailələrinin və qazilərimizin sosial durumunun yaxşılaşdırılması ilə bağlı layihələr həyata keçirilir. Mehriban xanım Əliyevanın rəhbərliyi ilə Heydər Əliyev Fondu və "YAŞAT" Fondu da bu istiqamətdə çoxsaylı layihələr həyata keçirir. Bu da dövlətimizin və hər bir azərbaycanlının şəhidlərimizə və qazilərimizə olan hörmətinin bariz nümunəsidir.

Hesab edirəm, bir il ərzində, dünyanın hansı ölkəsində yaşamasından asılı olmayaraq, hər bir azərbaycanlı öz həyatını qürur və fəxarət hissi ilə yaşadı, dünyanın bir bir çox millətlərinin qarşısında başını dik tutdu. Bütün bunlar məhz şəhidlərimizin hesabına oldu. Hesab edirəm ki, illər ötəcək, əsrlər keçəcək, amma hər bir şəhidin əziz xatirəsi həmişə xalqımızın qəlbində yaşayacaq.

Allah şəhidlərimizə rəhmət eləsin".

Aysel Yusifqızı

Telegramda izləyin