Məktəblilərin iş dəftərləri harda verilir? - RƏSMİ AÇIQLAMA

Bir neçə gün öncə məktəblilər üçün iş dəftərlərinin yalnız "Azərpoçt"un mərkəz filialında verilməsi ilə bağlı valideynlərdən birinin şikayət videosu yayılmışdı.

Valideyn iddia edirdi ki, bir neçə iş dəftərindən ötrü uzaq məsafə qət edərək "Azərpoçt"un mərkəz filalına gəlməlidirlər. Bununla yanaşı, sosial şəbəkələrdə valideynlərin məsələ ilə bağlı narazılıqları səngimək bilmirdi. Həmin məsələni araşdırdıq.

Sosial şəbəkələrdə yayılan görüntü ilə bağlı "Azərpoçt" MMC-dən Unikal.org-un sorğusuna cavab olaraq bildirildi ki, yayılan məlumat həqiqəti əks etdirmir.

Belə ki, "Azərpoçt" MMC ilə Təhsil Texnologiyaları Mərkəzi arasında bağlanan müqaviləyə əsasən Azərbaycan və rus bölmələri üzrə 1-ci və 2-ci siniflər üçün iş dəftərlərinin satışı 131-i Bakıda olmaqla Respublika üzrə bütün poçt şöbələrində həyata keçirilir. İş dəftərləri tələbata uyğun olaraq gündəlik hər bir poçt şöbəsinə paylanılır və satışı davam etdirilir.

Qeyd edək ki, son bir neçə gün ərzində iş dəftərlərilə bağlı poçt şöbələrinə müraciətlər çoxluq təşkil edir.

Sorğumuza cavab olaraq Təhsil İnstitutundan bildirilir ki, ötən illərdə olduğu kimi, iş dəftərlərinin əldə olunması "Azərpoçt MMC" vasitəsilə həyata keçirilir.

Qeyd edək ki, iş dəftərləri ərazi üzrə tələbata uyğun olaraq poçt şöbələrinə paylanılıb. Valideynlərin ərazi üzrə poçt şöbələrinə yaxınlaşmaları tövsiyə edilir.

Telegramda izləyin

instagramda izləyin