Azərbaycanda ölümlə nəticələnən DƏHŞƏTLİ QƏZALAR - SİYAHI

Avtomobil qəzaları, xüsusən yük maşını və avtobusların törətdiyi qəzalar dəhşətli hal almağa başlayıb.

Sonxeber.az son bir ayda Azərbaycanda baş verən yük maşını və avtobus qəzalarının siyahısını təqdim edir.

27 Sentyabr 2021
Dərnəgüldə "KamAZ" və "Opel" toqquşub. Hadisə Nərimanov rayonunda qeydə alınıb.

Ziya Bünyadov prospektində "KamAZ" markalı yük avtomobili ilə "Opel" markalı nəqliyyat vasitəsi toqquşub. Qəza nəticəsində "Opel" markalı avtomobilin sürücüsü, 1998-ci il təvəllüdlü Camalzadə Nicat Əvəz oğlu xəsarət alıb. Yaralı təcili tibbi yardımın köməkliyi ilə xəstəxanaya çatdırılıb. Müayinə zamanı ona döş qəfəsinin küt travması və bədənin çoxsaylı sıyrılmış yaraları diaqnozları qoyulub.

28 Sentyabr 2021
"KamAZ" sürücüsü faciəli şəkildə ölüb. Goranboyda yol kənarında "KamAZ" markalı yük maşınının sürücüsü avtomobilinin təkərini dəyişərkən hərəkətdə olan digər avtomobil tərəfindən vurulub.

Hadisə Dəliməmmədli şəhəri yaxınlığında baş verib. "KamAZ" sürücüsü, Daşkəsən rayon sakini, 1983-cü il təvəllüdlü Əsgərov Fikrət İsa oğlu aldığı xəsarətdən hadisə yerində dünyasını dəyişib.

29 Sentyabr 2021
Bakıda mikroavtobus piyadanı vurub. hadisə Heydər Əliyev prospektində baş verib. 1978-ci il təvəllüdlü Qasımov Ramiz Vahid oğlu prospektin əks tərəfinə keçərkən onu "Mercedes" markalı mikroavtobus vurub. Qəza nəticəsində bir nəfər yaralanıb.

30 Sentyabr 2021
Bakıda minik avtomobili yük avtomobili ilə toqquşub.

Hadisə sentyabrın 30-da günorta saatlarında paytaxtın kənar dairəvi yolunda, "Sədərək" ticarət mərkəzinin yaxınlığında qeydə alınıb.
Hadisə nəticəsində ölən və yaralanan olmasa da, avtomobillərə ciddi ziyan dəyib.

1 Oktyabr 2021
Gəncədə yük maşını motosikletlə toqquşub. Hadisə şəhərin Şah İsmayıl Xətai prospektində qeydə alınıb. Hərəkətdə olan "Ford Tranzit" markalı yük maşını ilə motosiklet toqquşub. Qəza zamanı iki nəfər xəsarət alaraq xəstəxanaya yerləşdirilib. Xəsarət alanların motosikletin sürücüsü və onun yanında olan həyat yoldaşı olduğu bildirilir.

2 Oktyabr 2021
Hacıqabulda sərnişin avtobusu qəzaya uğrayıb.

Hadisə Hacıqabul-Horadiz magistralının Hacıqabul rayonu ərazisindən keçən hissəsində qeydə alınıb. İritutumlu sərnişin avtobusu asfaltbasan maşın və daşla dolu avtomobillə toqquşub. Qəza nəticəsində 10 nəfər yaralanıb.

2 Oktyabr 2021
Bakı şəhər Yasamal rayonu ərazisində minik avtomobili ilə marşrut avtobusu toqquşub.

Məhəmməd Xiyabani küçəsində "Bolt" şirkətinin loqosu altında fəaliyyət göstərən taksi ilə 194 saylı marşrut xətti üzrə hərəkət edən "Daewoo" markalı avtobus toqquşub. Nəticədə minik avtomobili tamamilə yararsız vəziyyətə düşüb, maşında olan şəxslər xəsarət alıblar.

2 Oktyabr 2021
Biləsuvar şəhərində "Ford" markalı yük avtomobili Biləsuvar şəhər sakini, 1963-cü il təvəllüdlü Hüseynov Akif Hidayət oğlunu vurub. Yaralı piyada Biləsuvar Rayon Mərkəzi Xəstəxanasına çatdırılsa da, onun həyatını xilas etmək mümkün olmayıb.

5 Oktyabr 2021
Sumqayıt şəhərində "LADA" markalı minik avtomobili "KamAZ" markalı yük avtomobilinə çırpılıb. Nazirlikdən verilən məlumata görə, hadisə yerinə cəlb olunan FHN-nin Sumqayıt Regional Mərkəzinin xilasetmə qüvvələri sıxılı vəziyyətdə qalan sürücünü deformasiyaya uğrayan minik avtomobilindən çıxararaq aidiyyəti üzrə təhvil veriblər.

6 Oktyabr 2021
Bakı-Quba yolunun Sumqayıtın Yaşma yaşayış massivindən keçən hissəsində ölümlə nəticələnən yol qəzası qeydə alınıb. Yolu keçmək istəyən piyada 1990-cı il təvəllüdlü Qəniyev Vüsal Tofiq oğlunu yük maşını vurub. Ağır bədən xəsarətləri alan 31 yaşlı piyada ölüb.

8 Oktyabr 2021
Şəkidə yük maşını aşıb. Hadisə oktyabrın 7-dən 8-ə keçən gecə Şəki-Qax avtomobil yolunun 6-cı kilometrliyində, Şəki rayonu ərazisindən keçən hissəsində baş verib.

1990-cı il təvəllüdlü Bakı şəhər sakini Alim Babaş oğlu Xələfovun idarə etdiyi "Shacman" markalı, "99 BL 468" dövlət nömrə nişanlı iritutumlu yük maşını idarəetmənin itməsi səbəbindən yolun kənarındakı çökəkliyə aşıb. Qəza zamanı A. Xələfov müxtəlif dərəcəli bədən xəsarətləri alıb.

Aysel Səfərzadə

Telegramda izləyin