Nərminin qətli ilə bağlı yeni faktlar: Kəndə gələn naməlum şəxslər kimlər olub?

Tovuz rayonunun Dondar Quşçu kəndində 10 yaşlı Nərmin Quliyevanın qətlində təqsirli bilinən İlkin Süleymanovun cinayət işi üzrə məhkəmə prosesi keçirilib.

Sonxeber.az Teleqraf.com-a istinadla xəbər verir ki, Gəncə Ağır Cinayətlər Məhkəməsində hakim Dadaş İmanovun sədrliyi ilə baş tutan prosesdə Nərmin Quliyevanın bacısı Şəbnəm Quliyeva şahid qismində ifadə verib.

Şəbnəm Quliyevanın sözlərinə görə, hazırda 8-ci sinif şagirdidir, 14 yaşı var. Qeyd edib ki, 2019-cu il noyabrın 21-də bacısı Nərminin itkin düşdüyü gün kənddə tanımadığı maşın və içərisində olan iki kişi yolda saxlayıb: "Mən də evimizə aparmağı təklif etdilər. Lakin həmin şəxsləri tanımadığıma görə maşına minməkdən imtina etdim".

Şəbnəm Quliyeva qeyd edib ki, bundan sonra bacısının arxasınca əmisigilə gedib və bacısının orada olmadığını biləndə evlərinə qayıdıb: "Həmin gün Nərmin dərsdən məndən tez gəlmişdi. Atam gödəkçəni əmimgilə aparmağımızı, əvəzində başqa gödəkçəni gətirməyimizi istədi. Günorta saat 2-3 arası olardı. Mənim dərslərim vardı deyə Nərminə dedim ki, o getsin. 1-2 saat keçdi, Nərmin qayıtmadı. Atam məni də onun arxasınca göndərdi.

Əmimgilə getdim, dedilər ki, Nərmin 1 saat olar gedib. Qayıdanda yolda bir sarı taksi dayandı, içində iki nəfər vardı. Mənə dedilər ki, otur, aparaq səni. Tanımırdım deyə, getmədim. Mən kənd adamlarının əksəriyyətini üzdən tanıyıram. Bir az sonra qonşumuz maşını saxladı, ailəsi də içində idi, onlarla getdim".

Azyaşlının sözlərinə görə, bu məsələni bacısı itkin düşdüyünü vaxt polisə deyib: "Polis şöbəsində mənə 5 nəfərə yaxın adam və maşınlar göstərdilər. Hadisə günü məni evimizə aparmağı təklif edən avtomobil olub-olmadığını soruşdular. Adamların üzü yadımda qalmışdı. Onlar deyildilər".

Şəbnəm Quliyeva bildirib ki, Nərmin itkin düşdüyü gün atası ilə birlikdə qonşu kəndə qohumlarının toy öncəsi təşkil etdiyi "ciyəraxşamına" getməli imiş: "Lakin Nərmin gəlib çıxmadığına görə həmin axşam atam ora tək getdi.

Bundan sonra bacımın arxaslmca əmimgilə getdim. Gördüm, bacım əmimgildə də yoxdur. Ata nəməgillə də maraqlandım, onlarda da yox idi. Fikirləşdik ki, yəqin ana nənəmgilə gedib".
Şəbnəm Quliyeva bildirib ki, təqsirləndirilən İlkin Süleymanov onun atasının sinif yoldaşı olub: "Bu ailə ilə münasibətlərimiz yaxşı olub. Bir neçə dəfə bizə kitablar da verib. Nərmin və mən İlkini tanıyırdıq, balaca bacım yox. İlkinin ailəsi tərəvəz satırdı, ona görə onlara gedirdik. İlkinin özü ilə salamlaşırdıq, qaraqabaq adam idi. Amma anası ilə münasibətlərimiz yaxşı idi. Nərmin yerli kanallardan "Mədəniyyət"ə, futbola görə "İdman"a baxırdı. Türk kanallarına da baxırdı".

Şəbnəmin sözlərinə görə, bacısının boyu onun çiynindən idi.

Bacısının axırıncı dəfə evdən çıxıb əmisigilə gedəndə əynində yaşıl idman ayaqqabısı və qırmızı gödəkçə olduğunu deyən Şəbnəm onun başqa geyimlərini xatırlamayıb. İstintaqa ifadəsində isə o bildirib ki, bacısı əmisigilə getməmişdən az əvvəl məktəbdən gəlmişdi deyə əynində ağ köynək, qara ətək, ağ kalqotka vardı.

Bu məhkəmə prosesində Nərmin Quliyevanın qohumlarının (valideynləri, əmisi və bacısı) onun həmin gün geyimi ilə bağlı ifadələri arasında kəskin ziddiyyətlər var.

Azyaşlının ölümü ilə bağlı məhkəmə prosesini hüquq müdafiəçiləri, Ombudsman Aparatının nümayəndəsi də izləyir.

Məhkəmədən sonra jurnalistlərə açıqlamasında təqsirləndirilən İlkin Süleymanovun qardaşı Adil Süleymanov bildirib ki, iş materiallarında qardaşının bu cinayətə aidiyyəti olmadığını sübut edən çoxsaylı faktlar, şahid ifadələri var: "Nərmin itkin düşən vaxt kəndə xüsusi it gətirmişdilər. Görünür, uşağın paltarının iyi əsasında onun izi ilə getmişdi. Uşağın olduğu evlərə - əmisigilə girmişdi, oradan çıxıb, onun getdiyi istiqamət üzrə getmişdi. Bir qədər sonra iz itmişdi. O iti bizim evin yanından da aparıblar. Lakin bizim evə girməyib. Bunu atası Şərif Quliyev dindiriləndə də dedi. Əgər uşaq bizim evdə olsaydı, it mütləq ora girərdi..."

Növbəti proses noyabrın 17-də davam edəcək.

İttihama görə, 2019-cu il noyabrın 19-da itkin düşən Tovuz rayonunun Dondar Quşçu kənd sakini 10 yaşlı Nərmin Quliyevanın qətlə yetirilərək yandırılan meyiti bu il yanvarın 6-da kənd ərazisində aşkar edilib.

Daxili İşlər Nazirliyi, Dövlət Təhlükəsizliyi Xidməti və Baş Prokurorluğun əməkdaşlarından ibarət istintaq-əməliyyat qrupu tərəfindən cinayətin açılması istiqamətində həyata keçirilmiş təxirəsalınmaz istintaq hərəkətləri və əməliyyat-axtarış tədbirləri nəticəsində bu ağır cinayəti törətməkdə şübhəli bilinən Dondar Quşçu kənd sakini, işləməyən, 1973-cü il təvəllüdlü Süleymanov İlkin İbrahim oğlu tutularaq istintaqa cəlb edilib.

İş üzrə çoxsaylı şahidlər dindirilib, məhkəmə-tibbi, məhkəmə-bioloji, məhkəmə-kimyəvi ekspertizaları təyin edilib və digər zəruri istintaq hərəkətləri aparılıb.

İstintaq-əməliyyat qrupu tərəfindən İ.Süleymanovun yaşadığı evin həyətinə giriş qapısının və həyətə döşənmiş süni daş örtüyünün üzərindən, N.Quliyevanın saxlanıldığı otaqda olan çarpayının örtüyü və pərdənin üzərindən qanabənzər ləkələr, eləcə də iş üçün əhəmiyyət kəsb edən digər əşyalar maddi sübut kimi götürülüb.

İlkin Süleymanov şübhəli şəxs qismində müdafiəçinin iştirakı ilə dindirilərkən törətdiyi əməli tam etiraf edib.

İstintaq orqanı tərəfindən İlkin Süleymanovun barəsində Cinayət Məcəlləsinin 120.2.4 (xüsusi amansızlıqla qəsdən adam öldürmə), 120.2.9-cu (təqsirkar şəxs üçün aşkar surətdə köməksiz vəziyyətdə olan adamı öldürmə, habelə adam oğurluğu və ya girov götürülməsi ilə bağlı adam öldürmə), 144.3 (adam oğurluğu), 145.3-cü (qanunsuz azadlıqdan məhrum etmə, ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda) maddəsi ilə ittiham elan edilib.

Telegramda izləyin