Qarabağa böyük qayıdış nə zaman olacaq? - AÇIQLAMA

İstiqamət: Qarabağa böyük qayıdış

"Azərbaycan Vətən müharibəsində qələbəsindən sonra Qarabağa qayıdış istiqamətində çox böyük, ciddi addımlar atdı. Təbii ki, cənab Prezidentimizin rəhbərliyi ilə artıq işğaldan azad olunan rayonlarımızda böyük bərpa və yenidənqurma işləri həyata keçirilir".

Bu sözləri Sonxeber.az-a açıqlama verən deputat Ceyhun Məmmədov deyib.

O bu gün görülən işlərin olduqca əhəmiyyətli olduğunu vurğulayıb:

"Burada kompleks yanaşma olmalıdır. Əgər vətəndaş köçürülürsə onun orada məktəbi, xəstəxanası, baxçası, yaşayış yeri olmalıdır. Hamımıza məlum olduğu kimi, ermənilər bu ərazilərdə bütün infrastrukturu, yaşayış binalarını, məktəbləri, baxçaları, xəstəxanaları dağıdıblar. Bütün bunlar onu göstərir ki, Qarabağda çox böyük işlərin görülməsinə ehtiyac var və artıq biz bir neçə aydır ki, cənab Prezidentin davamlı olaraq bu ərazilərə səfər etdiyinin şahidi oluruq.

İlk belə rayonlardan biri Ağdam oldu. Ağdamda çox ciddi işlər görülür. Sonrakı mərhələdə isə Füzuli, Cəbrayıl, Qubadlı və Zəngilanda da bu istiqamətdə addımlar atılıb, çox böyük bərpa və quruculuq işləri aparılır. Eləcə də Şuşa haqqında deyə bilərik ki, Şuşada da bu gün bir çox qədim tarixi abidələrimiz, otellər bərpa olunub.

Bütün bunlar onu deməyə əsas verir ki, Azərbaycan qısa müddətdə bu əraziləri dünyanın ən abad, ən gözəl bölgələrindən birinə çevirəcək.

Burada bir neçə məqamı da qeyd etmək lazımdır. Bu proseslər cənab Prezidentin qətiyyətini, prinsipini göstərir, eyni zamanda da Azərbaycan dövlətinin gücünü və qüdrətini əks etdirir.

Bu gün bu layihələri Azərbaycan özü öz hesabına həyata keçirir, halbuki dünyada belə bir təcrübə var ki, bir sıra hallarda işğaldan azad olunan ərazilərə beynəlxalq qurumlar tərəfindən müəyyən dəstək olunur, vəsaitlər ayrılır. Amma Azərbaycan bütün bu işlərin hamısını özü həyata keçirir. Biz xeyli işləri görmüşük. Demək olar ki, bu ərazilərdə ilkin təməllər qoyulub.

Bir də burda bir məsələni də qeyd etmək lazımdır ki, cənab Prezident özü bütün bu prosesi tam nəzarətində saxlayır. Ötən aylarda cənab Prezidentin intensiv səfərlərinin şahidi olduq. O, işğaldan azad olunma günlərində etdiyi səfərlər zamanı orada görülən işlərlə tanış oldu, quruculuq-bərpa işlərinə birbaşa özü nəzarət etdi.

Elə bölgələr var ki, ora bir neçə dəfə səfər edib. Hər səfərində də, qeyd etdiyim kimi, obyektlərin yeni təməl qoymalarının şahidi oluruq. Bu onu göstərir ki, eyni zamanda Azərbaycan qısa müddətdə öz vətəndaşlarının doğma yurda qayıdışını təmin edəcək. O günlər uzaqda deyil.

Fürsətdən istifadə edib, vətəndaşlara da tövsiyə edirəm ki, səbirli olsunlar. Biz Allahın izni ilə bir neçə ilə öz yurd-yuvamıza qayıdacağıq. Hazırda təhlükəsizliklə bağlı məsələlər var. Bilirsiniz ki, ermənilər torpaqlarımıza çox sayda minalar basdırıblar. Qarşıda bu minaların təmizlənməsi kimi mühüm bir vəzifə var. Yəni böyük qayıdış üçün ilk öncə təhlükəsizliklə bağlı məsələlər tam həllini tapmalıdır".

Material Azərbaycan Respublikası

dəstəyi ilə hazırlanmışdır.

ZAİRA AKİFQIZI

Telegramda izləyin