"Çox arzulayıram, övladım mənə gəlib desin ki... " - Ozal İbrahimli ilə MÜSAHİBƏ

Sonxeber.az-ın növbəti qonağı ATV telekanalının Media və İctimaiyyətlə əlaqələr şöbəsinin rəhbəri Ozal İbrahimli olub.

Onunla müsahibəni oxuculara təqdim edirik:

- Özünüzü təqdim edərdiniz.

- Adım Ozal, soyadım İbrahimli. 30 yaşım var, ATV telekanalının "Media və İctimaiyyətlə əlaqələr şöbəsi"nin rəhbəri vəzifəsində çalışıram.

- Uşaqlığınız harda keçib?

- Bakıda doğulmuşam və uşaqlığımı burada keçirmişəm. Əslimiz isə Tovuz rayonundandır. Uşaq vaxtı yay fəslində ən çox ata yurdumuz olan Tovuza gedərdik. Yay tətilinə düşdüyü üçün istirahətimizi çox vaxt Tovuzda edərdik. Amma çox heyif ki, işlərimizlə bağlı artıq oralara tez-tez gedə bilmirik.

- Ən son nə vaxt Tovuzda olmusuz?

- Səhv etmirəmsə, 3 il əvvəl olar.

- Necə şagird olmusunuz? Heç dərsdən qaçmısınız?

- Təbii ki (gülür). İnanmıram ki, bizim vaxtımızda dərsdən qaçmayan şagird olsun. Məktəb vaxtı kənardan çox sakit uşaq kimi görünmüşəm, amma valideyn iclaslarında məndən də şikayətlər olurdu. Bizdə oğlan çox olduğu üçün sinifimizə məşhur türk filmindən götürülən "Hababam sınfı" adı verilmişdi. Əslində belə deyim ki, tərbiyəsiz yox, çox dəcəl idik. Hətta yadıma düşür, məktəb vaxtı belə bir hadisə olmuşdu. Basketbol çempionatı keçiriliridi və biz finala vəsiqə qazanmışdıq. Əgər finalda uduzsaq, məktəbdən çıxıb gedəcəkdik. Beynimizin "qanlı" vaxtları idi. İş elə gətirdi ki, məğlub olduq (gülür). Belə olan halda sinif olaraq birlikdə ərizə yazıb bildirdik ki, hamımız çıxırıq. Hər kəs adının qarşısından imza çəkdi. Mənə çatanda uşaqlar dedilər ki, imza əvəzinə qələmlə əlimi qaralayıb iz qoyum. Mən ərizə vərəqinə iz qoydum. Düzdür, uşaq idik, kim idi bizi ciddiyə alan? Ərizəni cırdılar. Amma məni o izə görə direktorun yanına aparıb danladılar. Günü bu gün də həmin sinif yoldaşlarımızla görüşür, ünsiyyətdə oluruq. Düzdür, hərəmiz bir sahədə işləyirik, elə də vaxtımız olmur, amma mümkün olduqca görüşürük.

- Neçə oldu ki, bu peşəni seçdiniz?

- Mən özüm Azərbaycan Texniki Universitetinin avto-nəqliyyat fakültəsini bitirmişəm. Oxuduğum müddətdə ixtisasıma bir o qədər də marağım olmayıb. Çöldə-bayırda gördüyüm hansısa bir hadisəni maraq olaraq "Facebook" sosial şəbəkəsində paylaşırdım. İnsanlardan maraqlı reaksiyalar, şərhlər alırdım. Özümə də xoş gəlirdi. Hazırda "Azxeber.com" saytının rəhbəri olan Hacıbəy Heydərli ilə uzun illər tanış idik. Mənə birlikdə fəaliyyət göstərməyi təklif edib dedi ki, fərqli ixtisasda oxusam da, məndə bu işə həvəs və maraq görür. Təkliffini qəbul etdim. İşlədikcə gördüm ki, məndə bu, artıq həvəs, maraq yox, peşəyə çevrilir. İllər keçdikcə özümü burada tapdığımı anladım. İnsan sevdiyi işlə məşğul olduqda, uğur özü onu tapır. Hazırda az-çox bir yerlərə gəlib çıxmışamsa, bunda Hacıbəy Heydərlinin zəhməti var.

- Təhsil aldığınız ixtisas seçimində valideynlərinizin təsiri olub, yoxsa öz istəyiniz olub?

- Hər dəfə bu sual mənə veriləndə bir az qəribə oluram. İxtisasımı öz istəyimlə seçməmişəm. Atam da həmin ixtisası bitirib. Onun ən böyük arzularından biri məni polis kimi görmək olub. Mən isə özümü o sahədə görməmişəm. İnsan işlədiyi sahəni sevmirsə, bir müddət sonra bezir. Artıq birinci kursun əvvəllərində gördüm ki, nə qədər mənə desələr də ki, nəqliyyat fakültəsi yaxşıdır, yenə alınmır. Evdən xəbərsiz, Azxeber.com-da çalışmağa başladım. 6-7 ay işlədikdən sonra bildilər və anladılar ki, ixtisasıma marağım yoxdur.

- Bəs niyə əvvəlcədən məhz atanızın oxuduğu ixtisasda oxudunuz?

- Bizim vaxtımızda valideyn hara yönləndirirdisə, ora gedirdik. Özümün incəsənətə bir az marağım olub. O vaxtlar da deyirdilər ki, "Gedib aktyor, müğənni, rejissor və ya incəsənətin başqa bir sahəsini oxuyacaqsan, Nə olacaq? Nə edəcəksən?" Bizdə elə idi ki, ya həkim, ya polis, ya da hüquqşünas olmalısan. Məni o qədər həvəsdən saldılar ki, dedim, hansı sahədə istəsələr, təhsil alaram, amma nəhayətində öz bildiyimi edəcəyəm.

- Bəs övladlarınız üçün necə? Onların ixtisas seçimlərini özlərinin öhdəsinə buraxacaqsız, yoxsa yenə də mentalitetə söykənəcəksiz?

- Yox. Heç vaxt! Düşünürəm, hətta çox arzulayıram, övladım 10-12 yaşlarında mənə gəlib desin ki, hər hansı bir sahəyə həvəsi var. Mən ondan xəbərsiz ona dəstək olaram. Çünki sabah həmin peşəylə o məşğul olacaq və sevdiyi işlə məşğul olduqda uğur qazanacaq.

- Həyata keçən və keçməyən arzularınız hansılardır?

- Futbolçu olmaq istəmişəm, buna həvəs və marağım da çox olub. Amma qismət... Hətta arzu edirəm ki, övladım futbolçu olsun, təbii ki, həvəsi olarsa. Belə isə heç vaxt məcbur etmərəm. Kişi də, qadın da ilk öncə atasının adıyla tanınır. Məsələn, deyirlər, filankəsin oğludur, ya qızıdır. Arzum olub ki, hər yöndə özümə elə hörmət qazanım ki, "filankəsin oğludur" sözünü unutdurum. Düşünürəm ki, o hörmət, az da olsa, qazana bilmişəm. Bu isə mənim üçün həyatda ən böyük xoşbəxtlikdir.

- Sizcə, kişilər daha çox yalan danışır, yoxsa qadınlar?

- Qadınlar daha çox vaxt məsələlərində bunu edirlər. Qadınlar açıq, kişilər isə gizli yalan danışırlar.

- Həyat yoldaşı yoxsa sevgili?

- Sevib ailə həyatı qurursansa, sevgilin sənin həyat yoldaşına çevrilir. Səhv etmirəmsə, yeganə ölkə Azərbaycandır ki, "həyat yoldaşı" ifadəsi var. Həyatının yoldaşını tapmaq isə hər kəsə nəsib olmur. İnsanlar var, ailələri uğursuz olur və boşanma ilə nəticələnir. Məncə, həyatının yoldaşını tapan insan elə ən böyük sevgini qazanıb.

ZAİRA AKİFQIZI

Telegramda izləyin