Paşinyanın arzusu ürəyində qaldı

Xatırladaq ki, dekabrın 14-də Brüsseldə Azərbaycan Prezidenti İlham Əliyevin Avropa İttifaqı Şurasının Prezidenti Şarl Mişel və Ermənistanın Baş naziri Nikol Paşinyan ilə birgə görüşü keçirilib. Görüş Belçikanın paytaxtı Brüsseldə baş tutub. Daha sonra Azərbaycan və Ermənistan liderləri təkbətək görüşüblər.

Sonxeber.az xəbər verir ki, Elm və Təhsil komitəsinin üzvü, deputat Ceyhun Məmmədov bu barədə özünün "Facebook" səhifəsində paylaşım edərək bildirib ki, Ermənistan görüşə "ciddi hazırlıqla" getmişdi:

"Görüşdən əvvəl o, cəbhə xəttində davamlı təxribat törədərək Azərbaycana qarşı ittihamlar səsləndirməyi, davamlı atəşkəsi pozmaqda ittiham etməyi planlaşdırırdı. Ancaq Paşinyanın arzusu bu dəfə də ürəyində qaldı. Brüssel görüşünə böyük ümidlərlə gedən Paşinyan növbəti dəfə pərt oldu. Onun görüşdəki üz cizgilərindən də bu açıq müşahidə olunurdu.

Görüş konstruktiv mühitdə keçdi, bir sıra mühüm məsələlər müzakirə olundu, Azərbaycanın işğaldan azad edilmiş ərazilərinin minalardan təmizlənməsi məsələsi gündəliyə gətirildi, Avropa İttifaqı bu istiqamətdə Azərbaycana texniki yardım göstərməyə hazır olduğu bildirildi. Azərbaycan uzun müddətdir ki, mina məsələsini gündəlikdə saxlamağa çalışırdı və bu görüşdə həmin məqsədinə nail oldu.

Görüşdə Ermənistan-Azərbaycan dövlət sərhədinin delimitasiyası ilə bağlı hər iki tərəf müvəqqəti işçi qrupun yaradılması ilə bağlı razılığa gəldilər, kommunikasiya və nəqliyyat xətlərinin açılması məsələsi geniş müzakirə olundu, Ermənistan tərəfi öz ərazisindən dəmir yolu xəttinin çəkilməsi ilə bağlı üzərinə düşən öhdəliyi təsdiq etdi.

Beləliklə, Ermənistan tezliklə dəmir yolunun çəkilişinə start verəcək. Görüşdə gömrük və sərhəd nəzarət məsələlərinin qarşılıqlı prinsip əsasında təmin olunması, Avtomobil yolunun marşrutunun müəyyən edilməsi ilə bağlı müzakirələrin davam etdirilməsi barədə də razılıq əldə edildi.

İkitərəfli görüşdən əvvəl Prezident İlham Əliyevin növbəti diplomatik gedişat edərək "Zəngəzur dəhlizində də heç bir gömrük post olmamalıdır. Əgər Ermənistan karqolara, insanlara nəzarət etmək istəsə, eynilə biz də Laçın dəhlizində gömrük postunun açılmasını təmin edəcəyik. Qərar Ermənistan tərəfindən verilməlidir. Hər iki varianta açığıq, ya hər iki tərəfdə gömrük post olmalıdır, ya da heç olmamalıdır" bəyanatını verməsi Ermənistan tərəfində soyuq duş effekti yaratdı. Dünəndən etibarən Ermənistanın bütün saytlarında, sosial şəbəkələrdə bu məslə ətrafında geniş müzakirələr aparılır, ciddi narahatlıqlar ifadə olunur.

Beləliklə, Azərbaycan növbəti dəfə Prezident İlham Əliyevin qətiyyətli və prinsipal mövqeyi nəticəsində beynəlxalq müstəvidə Ermənistan üzərində diplomatik qələbəsini təmin etdi. Ermənistan anlamalıdır ki, onun Azərbaycanla əməkdaşlıqdan və yekun sülh müqaviləsini imzalamqdan başqa yolu yoxdur. Artıq bütün dünya Ermənistandan üz çevirib. Əgər Ermənistan Azərbaycanın şərtləri ilə razılaşmasa ölkə daha ağır duruma düşəcək".

ZAİRA AKİFQIZI

Telegramda izləyin