"Azərbaycan həqiqətlərini və reallıqları artıq dünya qəbul edib" - DEPUTAT

İstiqamət: diaspor quruculuğu, lobbiçilik və dünya azərbaycanlılarının həmrəyliyi

"Bildiyimiz kimi, bu gün ölkəmizin sürətli inkişafı, Vətən müharibəsindən sonra geosiyasi vəziyyətin dəyişməsi, təbii ki, dostlarımızın sevincinə, düşmənlərimizin isə qəzəbinə səbəb olur. Düşmənlərimiz bu işdə səfərbər olublar, ölkə daxilində "sapı özümüzdən olan baltaların" əli ilə Azərbaycana qarayaxma kampaniyası aparılır, eləcə də xaricdən maliyyələşdirilən qurumlar tərəfindən böyük təbliğat və təşviqat işləri görülür".

Bu sözləri Sonxeber.az-a açıqlama verən deputat İlham Məmmədov deyib.

O, qeyd edib ki, VI çağırış Milli Məclis ilk işinə başlayarkən İlham Əliyev parlament qarşısında da əsas məsələlər sırasında beynəlxalq səviyyədə əlaqələrin qurulmasını, dostluq qrupların səviyyəsində Azərbaycan həqiqətlərinin dünyaya çatdırılmasını, Azərbaycansevər qüvvələrin cəmləşməsini və onlarla fəal işin aparılmasını vurğulayıb:

"Lakin Vətən müharibəsi zamanı biz gördük ki, cənab Prezidentimiz özü həm hərb meydanında cəsarətli bir sərkərdə kimi, həm də beynəlxalq mətbuata informasiyanın çatdırılması, dünyanda Azərbaycan haqqında düzgün fikirlərin formalaşması üçün çox böyük əmək sərf etdi. Hesab edirəm ki, bu istiqamətdə diaspor ilə lobbiçilik fəaliyyətinə və bizim uzun illər ölkəmizdə və xaricdə tədbirlərin keçirilməsinə görə "ağız büzən"lər, söz atanlar var idi.

Avroviziya, Avropa oyunları, İslam Həmrəyliyi oyunları, bir çox multikultural dəyərləri əks etdirən böyük konfranslar və digər tədbirlərin keçirilməsi Azərbaycanın dostlarının və lobbiçilərinin sayını artırdı.

Vətən müharibəsi zamanı da biz bunun şahidi olduq. Bizə dost ölkələrin lobbiçilik etməsi, Azərbaycan həqiqətlərini görən insanların, təşkilatların, dövlətlərin yanımızda olması xalqımıza güc-qüvvə verdi.

Bu gün mən çox cəsarətlə deyə bilərəm ki, Diasporla İş üzrə Dövlət Komitəsi də bu istiqamətdə işini çox yaxşı qurub.

Bu yaxınlarda Komitə nümayəndələri ABŞ-da digər diaspor təşkilatları ilə görüşüblər. Rusiyada diaspor təşkilatlarının formalaşması, lobbiçiliyin artırılması üçün çox aktiv və fəal iş görülür.

Vaxt var idi, biz dünyada informasiya blokadasında idik. Bizi dünyadan təcrid etmək istəyirdilər. Amma bu gün vəziyyət tamam fərqlidir. Biz cəsarətlə deyə bilərik ki, Azərbaycan həqiqətlərini və reallıqları artıq dünya qəbul edib.

Dekabrın 15-də Belçika Krallığının paytaxtı Brüsseldə Avropa İttifaqının Şərq Tərəfdaşlığının VI Sammitində, eləcə də NATO-nun sammitində İlham Əliyev şəxsən iştirak edib. Möhtərəm cənab Prezidentimiz ortaya qoyduğu şərtlər əsasında dünyanın geosiyasi mənzərəsinin artıq dəyişməsinin və regiona sülhün gəlməsinin vacib olduğu qeyd edib.

Təbii ki, bizim sərhədlərimiz daxilində görülən işlər çoxdur. Minalanmış ərazilərin təmizlənməsi və sərhəd delmitasiya-demarkasiya məsələlərinin sürətlənməsi üçün Avropa özü də artıq təkidlə müəyyən tələbləri irəli sürür.

Bu, bizim diplomatik qələbəmiz və uğurumuzdur! Əlbəttə, bütün bunların başında cənab Prezidentimiz durur. Diplomatik qələbə ilə yanaşı, diaspor və lobbiçilik fəaliyyəti də çox önəmlidir. Hesab edirəm ki, bundan sonra həmin fəaliyyəti daha da gücləndirmək çox vacibdir".

Material Azərbaycan Respublikası

dəstəyi ilə hazırlanmışdır.

ZAİRA AKİFQIZI

Telegramda izləyin