Prezident İlham Əliyevin Zəfər Günü müraciəti: Milli birliyin, dövlətçilik iradəsinin və tarixi Qələbənin təntənəsi

8 Noyabr - Zəfər Günü Azərbaycan xalqının çoxəsrlik dövlətçilik tarixində ən möhtəşəm səhifələrdən biri, milli qürurun, sarsılmaz iradənin və tarixi ədalətin təntənəsidir. Prezident, Müzəffər Ali Baş Komandan İlham Əliyevin 2026-cı il noyabrın 8-də Zəfər Günü münasibətilə Xankəndi şəhərindən Azərbaycan xalqına ünvanladığı müraciət bu möhtəşəm tarixi hadisənin siyasi, hərbi və mənəvi əhəmiyyətini bir daha nümayiş etdirdi.

Dövlət başçısının müraciətinin məhz Xankəndidən səsləndirilməsi xüsusi rəmzi məna daşıyır. Uzun illər işğal və separatizmin mərkəzi kimi təqdim edilən Xankəndidə bu gün Azərbaycan bayrağının dalğalanması, Zəfər memorialının ucaldılması və Prezidentin xalqa müraciət etməsi ölkəmizin qazandığı tarixi Qələbənin miqyasını ifadə edir. Bu, təkcə ərazi bütövlüyünün bərpasının deyil, həm də Azərbaycan dövlətinin suverenliyinin, siyasi iradəsinin və milli birliyinin təntənəsidir.

Prezident İlham Əliyev müraciətində ilk növbədə Vətən müharibəsində şəhid olmuş əsgər və zabitlərimizin xatirəsini ehtiramla yad etdi, Azərbaycan Silahlı Qüvvələrinin qəhrəmanlığını və fədakarlığını xüsusi vurğuladı. Dövlət başçısının bu fikirləri bir daha təsdiqləyir ki, Zəfərimizin təməlində şəhidlərimizin müqəddəs qanı, qazilərimizin fədakarlığı, hərbçilərimizin peşəkarlığı və bütövlükdə xalqımızın Vətən sevgisi dayanır.

2020-ci ilin 27 sentyabrında başlayan və 44 gün davam edən Vətən müharibəsi Azərbaycan tarixinin dönüş nöqtəsinə çevrildi. Azərbaycan Ordusu Ali Baş Komandanın rəhbərliyi ilə düşmənin illərlə qurduğu müdafiə sədlərini yararaq torpaqlarımızı işğaldan azad etdi. Prezidentin müraciətində qeyd etdiyi kimi, 300-dən çox şəhər və kənd döyüş meydanında azad edildi. Bu Qələbə Azərbaycanın hərbi qüdrətini, xalqımızın milli ruhunu və dövlətimizin qətiyyətini bütün dünyaya nümayiş etdirdi.

Müraciətin mühüm məqamlarından biri də Azərbaycan xalqının milli iradəsinin xüsusi qeyd olunmasıdır. Prezident İlham Əliyev vurğuladı ki, xalqımız 30 illik işğala, ağır məhrumiyyətlərə və müxtəlif xarici təzyiqlərə baxmayaraq, öz iradəsini qoruyub saxladı. Bu iradə, xalqın dövlət başçısına inamı və Ali Baş Komandan ətrafında sıx birləşməsi Qələbənin əsas şərtlərindən biri oldu. Müharibə dövründə Azərbaycan cəmiyyəti nümayiş etdirdi ki, milli maraqlar, Vətən sevgisi və dövlətçilik məfkurəsi bütün fərdi maraqlardan üstündür.

Prezidentin müraciətində səsləndirilən mühüm siyasi mesajlardan biri Azərbaycanın müstəqil dövlət kimi qazandığı mövqedir. Dövlət başçısı Azərbaycanın siyasi, iqtisadi və hərbi baxımdan heç kimdən asılı olmayan, müstəqil siyasət yürüdən güclü və ləyaqətli dövlət olduğunu xüsusi vurğuladı. Bu fikirlər Zəfərin yalnız hərbi nəticələrlə ölçülmədiyini, eyni zamanda Azərbaycanın beynəlxalq münasibətlər sistemində öz sözünü deyən, milli maraqlarını müstəqil şəkildə müdafiə edən dövlətə çevrildiyini göstərir.

Əslində, 44 günlük Vətən müharibəsində əldə edilən Qələbə Azərbaycan dövlətinin uzun illər ərzində həyata keçirdiyi məqsədyönlü siyasətin, güclü iqtisadiyyatın, müasir ordu quruculuğunun və milli həmrəyliyin məntiqi nəticəsi idi. Bu prosesdə Prezident İlham Əliyevin siyasi qətiyyəti və Ali Baş Komandan kimi rəhbərliyi həlledici əhəmiyyət daşıdı. Azərbaycan həm döyüş meydanında, həm də diplomatik müstəvidə öz haqlı mövqeyini müdafiə edərək qarşıya qoyduğu tarixi məqsədə nail oldu.

Zəfərin əhəmiyyəti yalnız 2020-ci ilin noyabrında əldə olunan nəticələrlə məhdudlaşmır. 2023-cü ilin sentyabrında həyata keçirilən lokal xarakterli antiterror tədbirləri nəticəsində Azərbaycanın bütün ərazilərində dövlət suverenliyinin tam bərpası ölkəmizin müasir tarixində yeni mərhələnin əsasını qoydu. Beləliklə, Zəfərlə başlayan tarixi proses suverenliyin tam təmin olunması ilə öz məntiqi davamını tapdı.

Bu gün işğaldan azad edilmiş ərazilərdə genişmiqyaslı bərpa və quruculuq işlərinin aparılması, şəhər və kəndlərin yenidən qurulması, keçmiş məcburi köçkünlərin doğma yurdlarına qayıdışı Zəfərin real nəticələrini nümayiş etdirir. Böyük Qayıdış proqramı Azərbaycanın yalnız torpaqlarını azad etmədiyini, həm də həmin ərazilərdə yeni həyat qurduğunu göstərir. Qarabağ və Şərqi Zəngəzur artıq bərpa, inkişaf, iqtisadi fəallıq və gələcəyə inam məkanına çevrilir.

Zəfər Günü həm də gələcək nəsillər qarşısında böyük məsuliyyət yaradır. Şəhidlərimizin canı bahasına əldə edilmiş müstəqilliyi, ərazi bütövlüyünü və suverenliyi qorumaq, dövlətimizin iqtisadi və hərbi qüdrətini daha da artırmaq hər bir Azərbaycan vətəndaşının vətəndaşlıq borcudur. Prezident İlham Əliyevin müraciətində Azərbaycanın bundan sonra da güclü olmasının vacibliyinə diqqət çəkilməsi məhz bu strateji yanaşmanın ifadəsidir.

Nəticə etibarilə, Prezident İlham Əliyevin Xankəndidən Azərbaycan xalqına ünvanladığı Zəfər Günü müraciəti keçmişə ehtiram, bu günə siyasi qiymət və gələcəyə ünvanlanan mühüm mesajlarla zəngindir. Bu müraciət bir daha göstərdi ki, Azərbaycan xalqı öz tarixinin ən ağır sınaqlarından birlik, həmrəylik və qətiyyət sayəsində qalib çıxıb. Zəfər bizim üçün yalnız hərbi Qələbə deyil, milli ləyaqətin bərpası, dövlətçilik iradəsinin təsdiqi və gələcək inkişafımızın möhkəm təməlidir.

Bu gün hər bir azərbaycanlı Zəfərlə fəxr edir, şəhidlərimizin əziz xatirəsini ehtiramla yad edir və güclü Azərbaycan naminə öz məsuliyyətini dərk edir. 8 Noyabr tariximizə əbədi həkk olunmuş milli qürur günüdür. Bu Qələbə gələcək nəsillərə Vətənə sədaqətin, milli birliyin, əzmkarlığın və dövlətə bağlılığın ən böyük nümunəsi kimi ötürüləcək.

Yaşasın müstəqil Azərbaycan! Yaşasın Azərbaycan Ordusu! Qarabağ Azərbaycandır!

Pərvin Kərimzadə
Milli Məclisin deputatı

Telegramda izləyin