İrəvanda dolaşan azərbaycanlılar: Ermənilər qorxudan evlərini satıb ölkədən qaçırlar

Ermənistanda hökm sürən acınacaqlı vəziyyət, ölkədəki sosial-iqtisadi mənzərə erməniləri başqa ölkələrə qaçmağa vadar edir.

Bu proses isə 44 günlük müharibədən sonra da intensiv xarakter daşıyır. Son günlər isə ermənilərin bu qaçış prosesinə don geyindirmək cəhdləri müşahidə olunmağa başlayıb.

Belə ki, sosial şəbəkənin erməni seqmentində Ermənistanda sərbəst şəkildə dolaşan azərbaycanlılar barədə şərhlər yer alıb.

Erməni sosial şəbəkə istifadəçisi Artur Kazaryan İrəvanda taksi sürücüsü ilə arasında baş vermiş hadisə barədə hekayədən bəhs edib.

Sürücünün sözlərinə görə, bu günlərdə onun avtomobilinə iki nəfər minib. Onların danışığından azərbaycanlı olduğunu anlayan sürücü müştərilərindən imtina edib. Bu zaman onlar patrul çağırıb şikayət ediblər. Polis sənədi yoxlayarkən onların həqiqətən də azərbaycanlı olduğu üzə çıxıb.

Sürücü bildirib ki, sərhədçilər rəsmi şəkildə azərbaycanlıları ölkəyə buraxıb.

Bu cür söhbətlər bir çox erməni sosial şəbəkə istifadəçisi tərəfindən vahiməyə səbəb olsa da, əslində məsələnin mahiyyətində başqa məqamın dayandığı görünür. Belə ki, Artur Kazaryan sonda taksi sürücüsünün evini sataraq ölkədən getməyi planlaşdırdığını "türklərlə" birlikdə yaşamaq istəmədiyini qeyd edib.

Bu məqamın özü erməni cəmiyyətindəki Azərbaycan və onun xalqına qarşı düşmənçiliyin ifrat səviyyədə olmasından xəbər verir. Bununla belə, riyakarlıq abidəsi ermənilər bu amildən ölkəni tərk etmələrinə bəhanə kimi istifadə edirlər.

Taksi sürücüsünün bəhs etdiyi əhvalat cəfəng olsa da, bir çox ermənilər üçün ələ düşmüş fürsət sayılır. Acınacaqlı həyat şəraitindən bezən ermənilər sürətlə Ermənistanı tərk edir. Bunun üçün isə ən kiçik arqument belə məqbul hesab olunur./Oxu.az

Telegramda izləyin