"Siz hər yalan danışdıqca millət daha da kasıblaşır, ərzaq daha da bahalaşır"

"Hər kəsin dilində bu söz var: "Bu ölkə düzəlməyəcək". Mən də hərdən deyirəm ki, "elədir ki, var" və dediyim sözə görə xəcalət çəkirəm, utanıram, ölüb yerə girirəm".

Sonxeber.az xəbər verir ki, bu sözləri deputat Razi Nurullayev deyib.

O bildirib ki, belə fikirlərin əksini sübut etməyə çalışmalıyıq:

"Bu sözləri sadə vətəndaş deyə bilər, bizlər yox. Biz isə mübarizə aparıb əksini sübut etməliyik. Xalq bizdən nəticə və sosial rifah gözləyir, biz də xalqa qoşulub onun dediyini deyəndə vəzifəmizə xəyanət etmiş oluruq.

Əsasən, xeyli vəzifəli şəxslər yalan danışır, yalan məlumat verir, yanlış yönləndirir, həcmindən və gücündən böyük danışır, özündən aşağıda olana nökər kimi baxır, özündən böyük olanın qabağında ikiyə bükülür, əzilir, büzülür, siması dəyişir, ağzı köpüklənə-köpüklənə tərif deyir. Bəstəboya deyir ki, sərv ağacı kimi boyu var, ucaboya deyir ki, bir az da boyu çıxsa, Xudavəndi-aləmin yanına çatacaq, çirkinə deyir gözəldir, eni-uzunu kvadrat olana deyir ki, Bred Pitdir.

Nə qədər yalan danışmaq olar?! Siz hər yalan danışdıqca millət daha da kasıblaşır, ərzaq daha da bahalaşır.

Amma, mənə ən toxunan budur ki, siz Prezident İlham Əliyevə də yalan deyirsiniz, yalanlara inandırırsınız. Elə yalanlar ki, o yalanların üstü açılsa, qasırğa qopar, tufan olar, Bakıya bir metr qar yağar, Kürdəmirdə Amazon meşələri əmələ gələr.

Allah "Qurani-Kərim"də buyurur: "Onların ürəyində mərəz var. Allah onların mərəzini daha da artırar. Yalan dedikləri üçün onlar şiddətli bir əzaba düçar olacaqlar!" (Bəqərə surəsi, ayət 10)"

ZAİRA AKİFQIZI

Telegramda izləyin