Bakıya niyə qar yağmır? - Ekoloqdan CAVAB

Bu il qış olduqca sərt keçsə də, hamının dörd gözlə gözlədiyi qar yağmaq bilmir. Axırıncı dəfə 2016-ci ildə, daha sonra nəhayət ötən il Bakı camaatı bir gün də olsa, sevindi. Hazırda isə rayonlarda, qonşu ölkələrdə hətta Saxara səhrasında qar olduqca güclü yağsa da, Bakıda hava şəraiti qeyri-sabit olaraq qalır. Gah güclü külək, gah sulu qar, yağış, bəzən yerdə belə qalmayan aldadıcı qar və yaz havasına bənzər günəşli hava paytaxtda hökm sürür. Bəs Bakıdakı qeyri-sabit hava şəraitinin səbəbi nədir?

Mövzuyla bağlı Sonxeber.az-a Azərbaycan Dövlət Pedaqoji Universitetinin professoru, Biologiya Elmler Doktoru, ekoloq Rauf Soltanov açıqlama verib.

O bildirib ki, Azərbaycanda olan təbii iqlim prosesi ölkəmizin özündə formalaşmır:

"Hər il olduğu kimi, Azərbaycan Respublikasında təbii iqlim şəraitində müəyyən dəyişkənliklər olur. Ümumiyyətlə, Azərbaycanda yanvar ayı bir qədər soyuq, fevral ayı isə nisbətən mülayim keçir və nəhayət, "boz ay" adlanan mart ayında hava şəraiti yenidən sərtləşir. Bu, təbii bir prosesdir.

Bakının iqlimi elədir ki, şimaldan gələn hava axınları bura sərbəst daxil olur. Mən özüm Şimal zonasındanam. Qubada əvvəllər 6 ay qış olurdu. Biz məktəbə gedəndə qalın palto geyinərdik, xizəklərimiz olardı. Amma indi Qubaya cəmi 3-4 dəfə qar yağır. İqlim şəraiti dəyişib. Digər bölgələrlə müqayisədə, Bakının temperaturu bir qədər yüksək, havası mülayim olur.

Ümumiyyətlə, fikir vermisinizsə, dağ günəşə yaxındır, amma ora soyuqdur, yağan qar da ərimir. Bakı və digər aran bölgələr günəşə daha uzaqdır, amma bu yerlərdə qar əriyir, qalmır. Məsələ bundadır ki, yerin tempuraturu, onun bünövrəsində gedən müəyyən proseslər torpağı isidir. Lakin yerdən dağ zirvəsinə qalxdıqca hər kilometrdən bir tempuratur aşağı enir.

Azərbaycanda hazırda olan təbii iqlim şəraiti bu gün ölkəmizin coğrafi mövqeyinə uyğundur. Yəni burada narahatlığa səbəb yoxdur. Amma təbii ki, havanın qarlı, yağışlı olması daha yaxşıdır, çünki bu, həmin ilin daha məhsuldar olacağını göstərir".

Aysel SƏFƏRZADƏ

Telegramda izləyin