"Allahla müqavilə bağlayırlar ki..." - Deputat dindarları TƏNQİD ETDİ

"Ümumiyyətlə, İslam dinində "nəzir qutusu", "nəzirvermə" anlayışları yoxdur. Ola bilsin ki, insanlar dini başa düşmürlər. "Nəzirvermə" anlayışını hansı dindən götürüblər?! Əgər dinləri İslamdırsa, bu dində belə anlayışlar mövcud deyil. Xristiandırlarsa, gedib kilsədə şam yandırmalı, dualarını etdikdən sonra qayıdıb evlərinə gəlməlidirlər. Hətta duanın özündə də hər hansı bir maddi tələb yoxdur".

Sonxeber.az xəbər verir ki, bu sözləri deputat Fazil Mustafa deyib.

O vurğulayıb ki, əlini göyə qaldırmadan da ürəyində Allaha dua etmək mümkündür:

"Deməli, nəzir məsələsi İslamda, xristianlıqda, qriqoryanlıqda yoxdur. Bəs bu nə dinidir?! Cahil insanların 100, 200, 500 ildir, "başlarını yeyib" aldadıblar ki, guya nəzir verməlidirlər. Niyə verməlidirlər?! Müasir dövrdə ianə forması var. İanəni də insanların ibadət yerlərinin, məscidlərin işıqpulu, qazpulu problemlərini həll etmək üçün verirlər. Yəni bu addımı məscidi qorumaq üçün atırlar.

Biri "mənim şəxsi problemlərim həll olunacaq" deyib Mirmövsüm ağanın qəbrinin üstünə qaçır. Digəri dağın başında üzərinə yaylıq örtülmüş bir pirin üzərinə yüyürür. Bir başqası əlinə əski parçası götürüb ağaca bağlayır ki, niyyəti yerinə yetsin.

Bunların hamısı cəhalət elementləridir. 21-ci əsrdə insanın bunu etməsi cəhalətdən xəbər verir. Bunu hansısa yüz nəfərlik bir sekta etmiş ola bilər. Bu, Avropada da, Amerikada da var. Bəzən psixoloji durumu pozulmuş xeyli insanlar birləşib sekta yaradırlar. Məsələn, Corctaunda bir təriqət var idi, sonra üzvlərinin hamısı intihar etdi. Bu cür rituallar həmin təriqətləri ayaqda saxlamaq üçün bir vasitədir.

Azərbaycan xalqında isə bu, bütünlüklə belədir: sanki nəzir verməsələr, olmaz. Allahla müqavilə bağlayırlar ki, "bu işim həll olunsun, qurban kəsəcəyəm". Bu cür absurd məsələnin, belə terminlərin qanunvericiliyə gətirilməsinin tərəfdarı deyiləm. Fikrimcə, "nəzir qutusu" ifadəsinin özü tamamilə yanlışdır".

ZAİRA AKİFQIZI

Telegramda izləyin

instagramda izləyin