Azərbaycanda yenidən sərt karantin rejimi tətbiq ediləcək? - AÇIQLAMA

Son günlər ölkə üzrə COVID-19-a yoluxanların sayında artım müşahidə olunur. Paralel olaraq yenidən sərt karantin rejiminə keçid məsələsi müzakirə olunmağa başlayıb.

Sonxeber.az xəbər verir ki, sərt karantin rejiminə keçid ilkin olaraq biznes subyektlərinə təsir göstərdiyindən bu, ümumi ölkə iqtisadiyyatında da geriləmələrə səbəb olur.

Necə ki, 2020-ci ildə uzun müddət tətbiq edilən sərt karantin rejimi yekunda neqativ iqtisadi göstəricilərlə nəticələnmişdi. İndiki halda isə Operativ Qərargahın karantin rejimi ilə bağlı hansı qərarı verəcəyi və bundan ilk növbədə hansı sektorların təsirlənə biləcəyi sual altındadır.

Milli Məclisin İqtisadi siyasət, sənaye və sahibkarlıq komitəsinin üzvü olan deputat Vüqar Bayramov Oxu.Az-a bildirib ki, ümumilikdə regionda yoluxma sayının artdığı müşahidə olunur, lakin buna baxmayaraq sərt karantin tədbirləri iqtisadi baxımdan arzuolunan deyil.

Millət vəkili əlavə edib ki, bu, real sektorun yenidən qapanmasına və iqtisadi baxımdan xüsusilə də sahibkarlıq subyektlərinin fəaliyyətlərinin məhdudlaşmasına gətirib çıxarır:

"Biz yenidən sərt karantin tədbirlərinin tətbiq olunmasının tərəfdarı deyilik. Sözsüz ki, Operativ Qərargah epidemioloji vəziyyətə uyğun olaraq qərar qəbul edəcək. Ümumi yoluxma, o cümlədən xəstəxanalardakı aktiv COVID-19 xəstələrinin sayı qərar verilən zaman əsas göstəricilər hesab olunacaq. Daha məqsədəuyğun olardı ki, sərt karantin tədbirləri tətbiq olunmadan indiki halda COVID-19 və onun yeni ştamlarına qarşı mübarizə davam etdirilsin".

Telegramda izləyin