Bir həftə sonra testin nəticəsi pozitiv qalırsa, niyə karantin müddəti 7 gündür?

Bildiyiniz kimi, karantin müddəti yeddi günə qədər azaldılıb. Lakin bir çox insanlar karantin müddəti bitdikdən bir neçə gün sonra təkrar test verdikdə, nəticə yenə də pozitiv olur. Əgər bir həftə sonra testin nəticəsi pozitivdirsə, niyə o zaman karantin müddəti yeddi gün təyin edilib? Belə olan halda insanların yoluxmayacağını necə bilə bilərik?

Məsələ ilə bağlı Sonxeber.az-a TƏBİB-in İctimaiyyətlə əlaqələr şöbəsinin məsləhətçisi Elnarə Baxış açıqlama verib.

O bildirib ki, əgər yeddi gündən sonra təkrar test verdikdə nəticə pozitivdirsə, deməli o adam hələ sağalmayıb::

"Karantin müddətinin bitməsi ilə bağlı o şəxslərə sms bildiriş gəlir. Onlar yeddi gün karantində qalırlar və karantin müddəti bitirsə, deməli, bu adam sərbəstdir. İstəsə, gedib təkrar test verə bilər. Test verirsə, deməli, şübhəsi qalıb və tam sağalmadığına görə təkrar yoxlanışdan keçir. Cavab pozitiv çıxsa, həmin adam yenə evdə qalır.

İkinci dəfə test vermək məcburi deyil. Kim istəyirsə, gedib test verə bilər. Xəstəliyin sağalması və karantin müddəti bir həftə hesablanır.

Həmin müddət beynəlxalq təcrübəyə əsasən 14 gündən 7 günə endirilib. Buna səbəb odur ki, "Omicron" ştammına yoluxanlar xəstəliyi yüngül simptomlarla keçirirlər".

ZAİRA AKİFQIZI

Telegramda izləyin