Küçədə qızları şillələyənə ətrafdan niyə reaksiya verilmir? - AÇIQLAMA

Oxumaq, işləmək, küçədə rahat yerimək - bunlar hər bir insanın haqqı, hüququdur. Yol gedərkən heç tanımadığın biri tərəfindən vurulmaq, döyülmək və ətrafdakıların buna etinasız münasibəti artıq adiləşir. Qızlara, qadınlara, ümumiyətlə insanlara qarşı aqressiyanın artmasına səbəb nədir? Yanından keçən qızları şillələyən birinə ətrafdan niyə reaksiya verilmir?

Məsələ ilə bağlı psixoloq Kəmalə Əliyeva Sonxeber.az-a açıqlama verib.

Onun sözlərinə görə, bu cür aqressiv səhnələr insanlar üçün o qədər adiləşib və əlçatan olub ki, belə hadisə gördükdə reaksiyasız qala bilirlər:

"Qıza kömək etmək istəyərkən, qarşı tərəfin kömək etmək istəyənə də nəsə etməsindən çəkinən insanlar ən azından qıza yaxınlaşıb, onun necə olduğunu soruşa bilərdilər, amma bu da baş vermədi. Çünki KİV-lə, kinolarla, oyunlarla bu aqressivliyə o qədər məruz qalınır ki, artıq insanlar üçün adiləşir.

Bu zaman həmin hərəkəti törədən insan araşdırılmalıdır. Onun hər hansı bir psixi pozğunluğunun olub-olmaması müəyyən edilməlidir. Əgər pozuntu varsa, bu onun məsuliyyətdən yayınmasına səbəb deyil. Elə olduqda reabltasiyaya tabe olunmalıdır.

Xəbərlərdə belə, o qədər kriminal məlumatları eşidirik, izləyirik ki, istər-istəməz bu cür hadisələr adi hərəkət kimi qəbul olunur. Halbuki həmin hadisələr bu qədər adiləşməməlidir, cinayət törədənlərin sonrakı həyatı, üzləşdikləri çətinliklər də mətbuatda yayılmalıdır ki, digərlərinə ibrət olsun".

Məsələyə münasibət bildirən sosioloq Əhməd Qəşəmoğlu, öz növbəsində, cəmiyyətdə mənəvi dəyərlərə üstünlük verilməli olduğunu bildirib:

"İnsanların bir-birinə kömək etməməsinə bir neçə səbəb ola bilər. Birincisi, bəzən yaxınlaşıb kömək etmək istəyənlərə də xəsarət yetirilir. Digər bir səbəb isə cəmiyyətin çox dəyişməsidir. İllər əvvəl küçədə bu cür hallara yol verilməzdi. İnsi isə sanki əhalinin problemləri çoxalıb, biganə, etinasız olublar. Əgər cəmiyyətdə mənəvi dəyərlərə üstünlük verilsə, orada insanlar özü-özlərini tənzimləyərlər, cəmiyyətdə ahəngdar münasibətlər yaranar. İnsanlar bir-birilə maşın, yaxud telefonunun nömrəsinə görə yarışma etməsinlər, toylarda qadınların üst-başı bər-bəzək mağazasına oxşamasın. Maddi dəyərlərə deyil, mənəvi dəyərlərə üstünlük verilərsə, bir çox uğurlar qazanmaq olar".

Aygün Osmanlı

Telegramda izləyin