Azərbaycanın Qış Paralimpiya Oyunlarında missiya rəhbəri və bayraqdarı müəyyənləşdi

Pekin-2022 XIII Qış Paralimpiya Oyunlarında iştirak edəcək Azərbaycan komandasının missiya rəhbəri və bayraqdarı müəyyənləşib.

Oxu.Az xəbər verir ki, Milli Paralimpiya Komitəsinin prezidenti İlqar Rəhimovun qərarına əsasən Rauf Mürsəlov Azərbaycan komandasının missiya rəhbəri təyin edilib. İdmançımız Mehman Ramazanzadə isə açılış mərasimində millimizin bayraqdarı olacaq.

Bu iki şəxsdən başqa, Azər Tapdıqov (Komitənin qış idman növləri üzrə kuratoru, mətbuat katibi), Məhəmməd İsmayılov (milli komandanın baş məşqçisi, Şahdağ Turizm Mərkəzinin xizək təlimatçısı) və Leyli Yusifli (COVID menecer, idman şöbəsinin aparıcı mütəxəssisi) Pekində nümayəndə heyətinin tərkibində yer alacaqlar.

Qeyd edək ki, Milli Paralimpiya Komitəsinin qış idman növləri üzrə milli komandasının üzvü ilk dəfə olaraq Qış Paralimpiya Oyunlarında iştirak edəcək.

Mehman Ramazanzadə kross-kantri növünün "sprint" kateqoriyasında çıxış edəcək. İdmançımızın yarışı 9 mart tarixində baş tutacaq.

Xatırladaq ki, XIII Qış Paralimpiya Oyunları 4-13 mart tarixlərində Çinin paytaxtı Pekində keçiriləcək. Oyunların açılış mərasimi martın 4-ü Pekin Milli Stadionunda baş tutacaq.

Telegramda izləyin