Ermənistandan növbəti təxribat – Azərbaycan yenidən anti-terror əməliyyatına başlaya bilərmi?

Ermənistan təxribat törətməyə davam edir. Bəs bəyannaməyə uymayan mənfur düşmənə qarşı, lazım gələrsə, anti-terror əməliyyatına başlanıla bilərmi?

Mövzuyla bağlı Sonxeber.az Milli Məclisin İqtisadi siyasət, sənaye və sahibkarlıq komitəsinin üzvü, millət vəkili Aydın Hüseynovdan münasibət öyrənib.

O bildirib ki, bu təxribatlar Ermənistan tərəfindən bəyannamənin şərtlərinə əməl olunmaması deməkdir.

"Azərbaycan Respublikasının Müdafiə Nazirliyinin məlumatında da qeyd edildiyi kimi, Rusiya sülhməramlılarının müvəqqəti yerləşdiyi Azərbaycan ərazisində qeyri-qanuni qalan və indiyə qədər oradan çıxmalı olduqları halda hələ də orada olan Ermənistan silahlıları torpaqlarımızı atəşə tutur. Məlumdur ki, bu kimi təxribatları onlar daimi törədirlər. Baxmayaraq ki, 10 Noyabr bəyannaməsinə əsasən, erməni quldurları, silahlı birləşmələri həmin ərazilərdən getməli idilər, indiyə kimi fəaliyyət göstərmələri, orada qalmaları və mütəmadi olaraq təxribatlara əl atmaları yolverilməzdir. Bu, Ermənistan tərəfindən bəyannamənin şərtlərinə əməl olunmaması deməkdir.

Hesab edirəm ki, belə təxribatlar davam edərsə, birinci növbədə sülhməramlı missiyasını həyata keçirmək vəzifəsini üzərinə götürən Rusiya onları ərazimizdən çıxartmalıdır.

Təxribatlar davam edərsə, təhdidlər yaranarsa, Azərbaycan ordusu, Azərbaycan dövləti öz ərazisində suverenliyini qorumaq üçün bu kimi özbaşınalıqların, quldurluğun qarşısını alacaq".

Aysel SƏFƏRZADƏ

Telegramda izləyin