"Toyota Prius " sürmək qəza riskini artırır? - Vaqif Əsədovdan CAVAB

Ölkəmizdə "Toyota Prius" markalı avtomobillərin sayı az deyil. Bir çoxları bu avtomobillə taksi fəaliyyəti göstərir. Danılmazdır ki, qəzaların sayı da çoxdur. Daha açıq desək, qəza törədənlər arasında adı çəkilən maşının sürücüləri çoxluq təşkil edir. Görəsən, buna səbəb avtomobilin daxili problemidir, yoxsa sürücü ehtiyatsızlığı?

Məsələ ilə bağlı Sonxeber.az-a Bakı Şəhər Baş Dövlət Yol Polisi İdarəsinin ictimaiyyətlə əlaqələr şöbəsinin rəisi, polkovnik Vaqif Əsədov açıqlama verib.

O vurğulayıb ki, bu gün Bakı şəhərində qeydə alınan yol qəza hadisələrində "Toyota Prius" markalı avtomobillərin adı çəkilsə də, problem avtomobil markasında deyil:

"Bu avtomobilin sayının çox olması amortizasiya xərclərinin az olmasından və sürücüyə daha çox gəlir gətirməsindən irəli gəlir. Avtomobilin texniki parametrləri, göstəriciləri tələblərə uyğun olmasa, alıb istifadə etməzlər.

Yol nəqliyyat hadisəsinin baş verməsi, idarə edilən nəqliyyat vasitəsinin nə nömrəsindən, nə markasından, nə də formasından aslı deyil.
Qəza hadisəsi nəqliyyat vasitəsini kimin və hansı formada idarə etməsindən aslıdır.

Başa düşürəm, bu gün Bakı şəhərində qeydə alınan yol nəqliyyat hadisələrində iştirak edən əsas avtomobillər "Toyota Prius" markasındadndır. Amma bunun səbəbi odur ki, sərnişindaşımada daha çox məhz həmin avtomobillərdən istifadə olunur.

Taksi fəaliyyəti ilə məşğul olanların əksəriyyəti də bu tip avtomobildən istifadə edir. Sözsüz ki, buna səbəb istismar xərclərinin az olması və istismar edilməsi ilə bağlı qazancın daha çox əldə edilməsidir.

Taksi fəaliyyəti ilə məşğul olanların bir çoxu istirahət etmədən, səhərdən gecəyədək işləyir, yuxusuz və yorğun olur. Bu da istər-istəməz yol nəqliyyat hadisələrinin çox sayda baş verməsinə səbəb olur. Bir daha vurğulayıram ki, bu, avtomobilin deyil, onu idarə edən şəxsin günahıdır".

ZAİRA AKİFQIZI

Telegramda izləyin