"BakıKart" terminalları yığışdırılır - Əhali nə etsin? - AÇIQLAMA

Son dövrlər "BakıKart" aparatları dayancaqlardan yığışdırıldıqdan sonra vətəndaşlar arasında xeyli narazılıqlar yaranıb. İnsanların rahatlığına görə, "MilliÖN"lərdə "BakıKart"a pul yükləmək funksiyasının açılması nəzərdə tutulsa da, digər aparatların yığışdırılması narahatlıqlara səbəb olub.

Belə ki, şikayətlərə əsasən, bir çox "MilliÖN"lər karta pul yükləmək istəyən zaman "xəta" verir. "BakıKart" aparatlarının da yığışdırılması ilə insanlar lap pis vəziyyətdə qalıblar. Bu problem necə həll olunacaq? Aparatların dayanacaqlardan yığışdırılmasının səbəbi nədir?

Mövzu ilə bağlı Sonxeber.az-a Bakı Şəhər İcra Hakimiyyəti başçısının tabeliyindəki Bakı Nəqliyyat Agentliyinin mətbuat xidmətinin rəhbəri Mais Ağayev açıqlama verib.

O bildirib ki, "BakıKart"ın balansının daha rahat artırıla bilməsi üçün müasir texnologiyalara əsaslanan yeni imkanlar yaradılıb:

"Avtobus dayanacaq məntəqələrindən ödəmə terminallarının götürülməsi əsasən provayderlərin səlahiyyətinə aid məsələ olduğundan bu barədə hər hansı bir fikir söyləmək istəməzdim. Lakin bu proses "BakıKart"ın balansını artırmaq imkanının məhdudlaşdırılması kimi qiymətləndirilməməlidir. Tam əksinə, əvvəlki vaxtlarla müqayisədə hazırda sərnişinlərimizə "BakıKart"ın balansını artıra bilməsi üçün daha geniş imkanlar təqdim edilir. Ötən ilin sentyabrından başlayaraq, sərnişinlərimizin "BakıKart"ın balansının daha rahat artırması üçün müasir texnologiyalara əsaslanan əlavə imkanlar yaradılıb. Nəticədə, artıq avtobus dayanacaq məntəqələrindən kənarda da sərnişinlərimiz "BakıKart"ın balansını artıra bilərlər. Belə ki, əvvəllər sərnişinlərimizin istifadəsində avtobus dayanacaq məntəqələrində 197 ədəd "MilliÖn" və 50 ədəd "BakıKart" terminalı mövcud idi. Sentyabrda tətbiq edilən yenilik sayəsində hazırda bütün "MilliÖn" terminalları "BakıKart" ödənişlərini qəbul edir. Birdən-birə sərnişinlərimizin ödəniş etmə imkanları əhəmiyyətli dərəcədə yaxşılaşıb, genişlənib. Yəni "MilliÖn" terminalları vasitəsilə etdiyiniz digər ödənişlər kimi, "BakıKart" balansınızı da artıra bilərsiniz".

Aysel SƏFƏRZADƏ

Telegramda izləyin