Rusiya-Ukrayna müharibəsi: Tramp razılaşmanın yaxın olduğunu açıqladı, cəbhədə döyüşlər şiddətlənir

ABŞ Prezidenti Donald Tramp Rusiya ilə Ukrayna arasında müharibənin başa çatdırılması ilə bağlı razılaşmanın yaxın olduğunu bildirib.

Sonxeber.az Reuters-ə istinadən xəbər verir ki, Tramp noyabrın 5-də Ağ Evdə Rusiya Prezidenti Vladimir Putinin xüsusi nümayəndəsi Kirill Dmitriyevlə görüşündən sonra jurnalistlərə açıqlamasında tərəflər arasında böyük razılaşmanın əldə ediləcəyini deyib. Onun sözlərinə görə, mümkün razılaşma yalnız Ukraynanı deyil, Avropanın digər ölkələrini də əhatə edə bilər.

ABŞ lideri danışıqların detalları barədə açıqlama verməsə də, münaqişənin həllinə yaxın olduqlarını vurğulayıb. Qeyd edək ki, ABŞ, Rusiya və Ukrayna nümayəndələrinin noyabrın 10-11-də Əbu-Dabidə üçtərəfli danışıqlar keçirməsi planlaşdırılır.

Rusiya Ukraynaya kütləvi hava hücumu həyata keçirdi: 4 nəfər yaralanıb

Rusiya ordusu Ukraynanın müxtəlif bölgələrinə pilotsuz uçuş aparatları ilə hücum edib.

Associated Press-in məlumatına görə, noyabrın 5-nə keçən gecə həyata keçirilən hücumlar nəticəsində Dnepropetrovsk və Kiyev vilayətlərində azı 4 nəfər yaralanıb.

Ukrayna Hərbi Hava Qüvvələri Rusiyaya məxsus 128 pilotsuz uçuş aparatından 105-nin zərərsizləşdirildiyini açıqlayıb. Hücumlar nəticəsində yaşayış evlərinə, infrastruktura və logistika obyektlərinə ziyan dəyib.

Rusiya tərəfi isə Ukraynanın müxtəlif ərazilərdə həyata keçirdiyi dron hücumlarına cavab olaraq öz hava hücumundan müdafiə sistemlərinin fəaliyyət göstərdiyini bildirib.

Ukrayna Rusiyanın Ryazan şəhərindəki neft emalı zavoduna zərbə endirdi

Ukrayna ordusu Rusiyanın Ryazan vilayətində yerləşən neft emalı zavoduna pilotsuz uçuş aparatları ilə hücum edib.

Məlumata görə, noyabrın 5-nə keçən gecə həyata keçirilən hücum zamanı müəssisənin ərazisində yanğın baş verib. Ryazan vilayətinin qubernatoru Pavel Malkov hücum nəticəsində bir nəfərin yaralandığını bildirib.

Rusiya Müdafiə Nazirliyi həmin gecə ölkənin müxtəlif bölgələrində 496 Ukrayna dronunun məhv edildiyini açıqlayıb.

Müharibənin gedişində Ukrayna Rusiyanın yanacaq və hərbi-logistika infrastrukturunu hədəfə almaqda davam edir.

Ukraynada Rusiya bombardmanının qurbanlarının sayı 53-ə çatdı

Ukraynanın Zaporojye vilayətində humanitar yardım məntəqəsi kimi istifadə edilən keçmiş məktəb binasına Rusiyanın endirdiyi hava zərbəsi nəticəsində ölənlərin sayı 53-ə yüksəlib.

Associated Press-in məlumatına görə, noyabrın 2-də Komışuvaxa yaşayış məntəqəsində baş verən hücum zamanı bina dağılıb. Hadisədən sonra dağıntılar altında qalan insanların axtarışı davam etdirilib.

Ukrayna Prezidenti Vladimir Zelenski ölənlərin sayının artdığını, onlarla şəxsin isə itkin düşmüş hesab edildiyini bildirib.

Hücumun humanitar yardım almaq üçün toplaşan insanların olduğu ərazidə baş verdiyi qeyd olunur.

Zelenski Qərbdən Rusiyaya qarşı təhlükəsizlik zəmanətləri tələb etdi

Ukrayna Prezidenti Vladimir Zelenski ölkəsinin müharibədən sonrakı təhlükəsizliyinin təmin olunması üçün Qərb dövlətlərindən konkret zəmanətlər istəyib.

Associated Press-in məlumatına görə, Zelenski Brüsseldə ABŞ, Böyük Britaniya, Fransa, Almaniya və Avropa İttifaqının nümayəndələri ilə keçirilən müzakirələrdə təhlükəsizlik məsələsini gündəmə gətirib.

Ukrayna lideri mümkün sülh razılaşmasından sonra Rusiyanın yenidən hücum edəcəyi təqdirdə müttəfiqlərin necə hərəkət edəcəyinin əvvəlcədən müəyyənləşdirilməli olduğunu vurğulayıb.

O, həmçinin Ukraynanın hava hücumundan müdafiə sistemlərinə, xüsusilə Patriot raketlərinə ehtiyacının davam etdiyini bildirib.

Müəllif: İlkin Məmmədkərimov

Telegramda izləyin