Qarabağ və Şərqi Zəngəzurda görülən işlər nədən ibarətdir? - AÇIQLAMA

"Prezident İlham Əliyevin sədrliyi ilə, cari ilin 1-ci rübünün yekunlarına həsr olunmuş müşavirədə Azərbaycan xalqının gündəlik maraq dairəsində olan, qazanılmış uğurlarla yanaşı, qarşıda duran bir çox vəzifələrə aydınlıq gətirildi".

Bunu Sonxeber.az-a danışan deputat Nəsib Məhəməliyev bildirib.

Deputat qeyd edib ki, dövlət başçısı giriş və yekun nitqlərində konkret rəqəmlərlə, faktlarla sosial-iqtisadi, maliyyə-büdcə, işğaldan azad olunmuş ərazilərdə aparılan işlər, infrastruktur layihələrinin icrası, Ermənistan-Azərbaycan münasibətlərində yaranmış vəziyyət, Silahlı Qüvvələrdə aparılan struktur islahatları, beynəlxalq təşkilatlar və qonşu ölkələrlə əməkdaşlıq sahəsində əldə olunmuş nailiyyətlərlə ölkə ictimaiyyətini məlumatlandırdı:

"Hesab edirəm ki, müşavirə materiallarının daha geniş ictimaiyyətə çatdırılması üçün, müzakirə olunan məsələlərin sisrtmləşdirilməsi doğru olardı. Dünya iqtisadiyyatında mənfi tendensiyaların artmasına baxmayaraq, milli iqtisadiyyatın inkişafının, ÜDM-in 6.8% artmasının şahidi oluruq. Dövlət büdcəsi profisitlə icra olunur, vergi daxil olmaları, proqnozdan əlavə, 700 milyon təşkil edib, valyuta ehtiyatları, qeyri-neft iqtisadiyyatı 10% artıb. Xarici ticarət dövriyyəsində 60% artımla, cəmi üç ayda 5 milyard dollarla müsbət saldo əldə olunub.

Qarabağ və Şərqi Zəngəzur iqtisadi rayonlarında görülən işlər nədən ibarətdir?

İşğaldan azad olunan ərazilər minalardan təmizlənir. Keçən il həmin ərazilərdə 20 meqavat gücündə 4 su elektrik stansiyası, 9 yarımstansiya inşa edilib.

Yol infrastrukturu sürətlə şaxələnir və 30 il işğalda olmuş rayonları birləşdirən magistral yollar inşa olunur. Əvvəllər heç vaxt yol olmayan ərazilərdə 700 km yeni yol çəkilib.

Rayonların Baş planları üzərində iş gedir, bəzi rayonlarınkı artıq hazırdır. 2023-cü ildə Türk Dünyasının mədəniyyət paytaxtı seçilmiş Şuşa şəhəri isə xüsusi planlar üzrə bərpa olunur. Heydər Əliyev Fondu tərəfindən 3 məscid təmir olunur, 1 yeni məscidin tikintisinə başlanılır, tarixi-memarlıq abidələri bərpa olunur. İnzibati, yaşayış binaları, xəstəxana, teleqüllə, 5 ulduzlu otel tikilir. Məktəblərin tikintisinə start verilir. Şəhərin içməli su və digər problemlər həll olunur.

Qarabağ və Şərqi Zəngəzur iqtisadi rayonları kənd təsərrüfatı ilə məşğul olmaq üçün münbit torpaq, su, iqlim keyfiyyətlərinə məxsusdur. Həmin torpaqların dövriyyəyə qaytarılması üçün tədbirlər görülür və artıq 50 hektardan çox ərazidə əkin aparılıb. Dünya üzrə proqnozlaşdırılan ərzaq çatışmazlığı fonunda böyük bir ərazinin istismarı, təbii olaraq, iqtisadiyyatımıza güc qatacaq".

Ermənistan-Azərbaycan münasibətləri, beynəlxalq təşkilatlar və qonşu dövlətlərlə aparılan işlər barədə isə deputt bunları deyib:

"Aprel ayının 6-da Avropanın siyasi paytaxtı Brüssel şəhərində üçtərəfli görüş keçirildi və Prezident İlham Əliyevin əvvəldən irəli sürdüyü 5 şərt həm Ermənistan, həm Avropa İttifaqı tərəfindən qəbul edildi. Mənasız bir qurum olan ATƏT-in Minsk qrupu və status məsələsi tarixin arxivinə atıldı. Nizamlanma istiqamətində müddət təyin olunmaqla konkret şərtlər qoyuldu. Bununla da Ermənistan başa düşdü ki, havadarları ona kömək etmək iqtidarında deyillər və tam dalana dirənmiş oldu. Əgər üzərinə götürdüyü öhdəlikləri yerinə yetirməsə, Azərbaycanın alternativ variantları kifayətdir ki, öz problemllərini, konkret olaraq kommunikasiya məsələsini qonşu İranla həll etsin. İmzalanmış Anlaşma Memorandumu bunun təsdiqidir".

Nəsib Məhəməliyev, həmçinin, vurğulayıb ki, Silahlı Qüvvələrdə aparılan struktur islahatları, yeni komando hissələrinin yaradılması, müasir silahların, döyüş texnikasının alınması ilə bağlı məsələlər dövlət başçısının gündəlik nəzarətindədir:

"Fərrux dağının azad olunmasının strateji əhəmiyyəti son dərəcədə vacibdir. Ətraf ərazilərə nəzarətlə bərabər, su hövzələrinin erməni təxribatlarından qorunması, aqrar sektorun, turizmin inkişafı baxımından da əvəzolunmazdır.

Ümumiyyətlə, müharibədən sonra Azərbaycanın yaratdığı yeni reallıqların beynəlxalq təşkilatlar tərəfindən qəbul olunması, ölkəmizin gücünün nümayişi Prezident İlham Əliyevin beynəlxalq nüfuzunun nəticəsidir. Təsadüfi deyil ki, müşavirə ilə bağlı materiallar qardaş Türkiyənin və bir sıra ölkələrin mətbuatında da yer alıb. Azərbaycan xalqı öz dövləti ilə, dünyada baş verən mürəkkəb geosiyasi proseslərin fonunda əldə olunan nailiyyətlərlə fəxr edə bilər".

Aysel Yusifqızı

Telegramda izləyin