"Heç bir beynəlxalq təşkilat və qurumlar rəsmi Bakının qərarlarına qarşı çıxış edə bilməz"

"Prezident İlham Əliyevin Sədrliyi ilə keçirilən 12 aprel müşavirəsində diqqət çəkən məqamlardan biri də Azərbaycanın yaxın gələcəkdə daha nəhəng iqtisadi potensiallar əldə etməsi ilə bağlı irəli sürülən fikirlər oldu".

Bunu Sonxeber.az-a açıqlamasında deputat Aydın Hüseynov deyib.

Deputat qeyd edib ki, hazırda qarşıda dayanan mühüm proseslərdən biri də Zəngəzur dəhlizinin açılması ilə bağlıdır:

"Regional kommunikasiyaların açılması barədə həm 10 noyabr 2020-ci il tarixli üçtərəfli bəyanatda, həm də 11 yanvarda imzalanan üçtərəfli bəyanatda da əks olunub. Lakin ötən müddət ərzində Ermənistan tərəfi üzərinə götürdüyü öhdəlikləri yerinə yetirməyib və bu amilə toxunan dövlət başçısı bildirib ki, əgər, üçtərəfli razılaşmanın tələbləri bundan sonra da pozulacaqsa, Azərbaycan tərəfi öz maraqlarının təmin olunması istiqamətində daha qəti addımlar ata bilər və bununla da Ermənistanın etibarsızlığı daha çox ifşa olunacaq. Qərbi Zəngəzurdan keçməklə Naxçıvan və Türkiyəyə bütün növ kommunikasiyalar açılmayacaqsa, Azərbaycan üçtərəfli razılaşmanın Ermənistan tərəfindən icra edilmədiyini irəli sürərək bütün bəndləri etibarsız hesab edə bilər. Və belə olan halda, heç bir beynəlxalq təşkilat və qurumlar rəsmi Bakının qərarlarına qarşı çıxış edə bilməz. Çünki ortada rəsmi bəyanatlar, imzalar mövcuddur. Hesab edirəm ki, cənab Prezidentin qəti fikirləri Ermənistana sonuncu ciddi xəbərdarlıq kimi də qiymətləndirilə bilər".

Deputat vurğulayıb ki, əvvəlki illərdə ölkə həyatının bütün sahələrini əhatə edən dinamik inkişaf bu ilin 3 ayı ərzində də davam edib və göstəricilər xeyli yüksəkdir:

"Ümumi daxili məhsulda 6,8 faiz artım olub və bu da, sözsüz ki, ötən ilin uğurlarının davamıdır. Aydın görünür ki, həyata keçirilən davamlı və uğurlu islahatlar nəticəsində ölkəmizin iqtisadi qüdrəti durmadan artmaqdadır. Eyni zamanda, ölkəmiz bütün göstəricilərinə görə pandemiya şəraitindən qalib çıxan azsaylı ölkələrdəndir. Təbii ki, bu, bütövlükdə Azərbaycanın iqtisadi qüdrətini dünyaya bir daha nümayiş etdirdi. O cümlədən, son 3 ayda qeyri-neft sektorunda da iqtisadiyyatımız inkişaf edib. Belə ki, bu sektorda 10 faizdən çox artım olub. Bu da iqtisadiyyatımızın neftdən asılılığının azaldılması istiqamətində görülən tədbirlərin effektli nəticəsidir.

Dövlətimizin başçısı Azərbaycanın regiona gətirdiyi reallıqlara da toxunub. Biz, həqiqətən də, bu reallıqların dünya dövlətləri və beynəlxalq təşkilatlar tərəfindən qəbul olunduğunu görürük. Onlar bu vəziyyətin sülh və təhlükəsizliyə əsaslandığını dərindən dərk edir və region ölkələri arasında bütün sahələrdə, o cümlədən iqtisadi əməkdaşlıqda əhəmiyyətini anlayırlar. Ümumiyyətlə, İqtisadi inkişaf bu templə davam edərsə, ilin sonuna qədər rəqəmlər daha yüksək olar və ölkəmizin iqtisadi imkanları daha da artar. Bütün bunlar, əlbəttə ki, real proqnozlardır. Nəticədə, biz 12 aprel müşavirəsinin ölkədaxili və xarici milli çağırışlar kontekstində mühüm bir hadisə kimi yadda qaldığının şahidi olduq".

Aysel Yusifqızı

Telegramda izləyin