Bəraət aldıqdan sonra öldürülən idmançının hökmü LƏĞV EDİLDİ

Bakıda kriminal avtoritetin qətlində ittiham olunan Zaur Yusifov və Həsən Tağıyevlə bağlı hökmdən verilmiş şikayətlə bağlı apellyasiya protestinə baxılıb.

Sonxeber.az APA-ya istinadla xəbər verir ki, Bakı Apellyasiya Məhkəməsində şikayətlə bağlı qərar elan olunub.

Qərara əsasən, təqsirləndirilən şəxslərlə bağlı Bakı Ağır Cinayətlər Məhkəməsinin hökmü dəyişdirilib.

Məhkəmənin qərarı ilə birinci instansiya məhkəməsinin hökmü ilə bəraət almış Zaur Yusifov Cinayət Məcəlləsinin 120.2.1 və 120.2.4-cü (xüsusi amansızlıqla qəsdən adam öldürmə) maddələri ilə təqsirli bilinib. Təqsirləndirilən şəxs azadlığa çıxdıqdan sonra vəfat etdiyi üçün cinayət işinə bəraətverici əsaslar olmadan xitam verilib.

Digər təqsirləndirilən Həsən Tağıyev barəsindəki 18 il azadlıqdan məhrum etmə cəzası isə qüvvədə saxlanılıb.

Xatırladaq ki, qətl hadisəsi 2019-cu il may ayının 10-na keçən gecə Bakının Binəqədi rayonu, 6-cı mikrorayon ərazisində, İsrafil Haşımov küçəsində baş verib. 1995-ci il təvəllüdlü Həsən Tağıyev şəxsi münasibətlər zəminində aralarında yaranmış mübahisə zamanı 2008, 2012, 2013, 2014-cü illərdə Cinayət Məcəlləsinin 315.1, 315.2, 221.1-ci maddələri ilə məhkum olunmuş 1988-ci il təvəllüdlü Emin Səfərovu çoxsaylı bıçaq xəsarətləri ilə qəsdən öldürüb.

Hadisə ilə bağlı ilk olaraq Həsən Tağıyev saxlanılıb. Qətllə bağlı 1984-cü il təvəllüdlü Zaur Yusifov isə mayın 12-də şübhəli şəxs qismində tutulub.

Bakı Ağır Cinayətlər Məhkəməsinin hökmü ilə Həsən Tağıyev CM-in 120.2.4 (xüsusi amansızlıqla adam öldürmə) və 228.4-cü (qanunsuz olaraq qaz silahını, soyuq silahı, o cümlədən soyuq atıcı silahı əldə etmə, satma və ya gəzdirmə) maddələri ilə təqsirli bilinərək 18 il müddətinə azadlıqdan məhrum edilib. Zaur Yusifovun isə qətldə iştirakı sübut olunmadığı qənaətinə gəlinərək ona bəraət verilib.

Z.Yusifov azadlığa buraxıldıqdan bir müddət sonra güllələnərək qətlə yetirilib.

Onu da deyək ki, qətlə yetirilən Emin Səfərov kriminal aləmdə "Emin 444" ləqəbi ilə tanınıb. O, "Lotu Quli" kimi tanınan kriminal avtoritet Nadir Səlifovun yaxın adamı kimi təqdim edilib.

Zaur Yusifov kikboksinq üzrə tanınmış idmançı olub.

Telegramda izləyin