Sperma donorundan uşaq dünyaya gətirmək haramdır? - AÇIQLAMA

Bir neçə gün əvvəl Azərbaycanda sperma bankının yaradılması ilə bağlı xəbər yayıldı. Yəni istənilən şəxsin süni mayalanma üçün könüllü şəkildə donor olması mümkündür. Əslində bu, gələcəkdə bacı-qardaş evliliyinə gətirib çıxara və beləliklə xəstə uşaqların dünyaya gəlmə ehtimalını artıra bilər. Müsəlman ölkəsi olduğumuzu nəzərə alaraq, məsələyə dini cəhətdən yanaşmaq qərarına gəldik. Görəsən, İslam dini belə bir üsula icazə verirmi?

Mövzu ilə bağlı Sonxeber.az-a ilahiyyatçı alim Ağa Hacıbəyli açıqlama verib.

O bildirib ki, donor məsələsi yalnız və yalnız nikah çərçivəsində çıxış yolu ola bilər:

"Yəni ər-arvadın ikisinin övladıdırsa, buna qadağa yoxdur. Dinimizin yeganə icazə verdiyi, uyğun gördüyü, tibbin də bu gün əli çatdığı, doğurdan da bir çox ailələrə övladın gəlişinə səbəb olan süni mayalanma yalnız nikah çərçivəsində olmalıdır.

Amma dünyada bunun xaricində böyük bir biznes sektoru açılır və bir çox insanlar belə üsulla övlad sahibi olmaq istəyirlər. Onlar o böyük ümüdlərini haram, qadağan olunmuş yollara bağlayırlar. Əslində günah sayılan üsul bala həsrətində olanlara bəla verəcək, millətə fəlakət gətirəcək. Çünki bu, əslin, soyun bir-birinə qarışması, nəticədə Allahın rəhmətinin yer üzündən silinib getməsi deməkdir. Belə böyük bir haramı, fəlakəti ailələrə yaşatmaq nəsillərin kəsilməsi deməkdir.

Bunlar milli düşüncəmizə, mədəniyyətimizə ziyandır. Bilmirəm, Allahın "əl həkim" isminə "əli çatan" hansı həkim belə bir işə qol qoyar. O həkimin vəzifəsi toplumun, cəmiyyətin, xalqın səhhətilə maraqlanmaqdır, haram iş görmək deyil.

Qarabağda, səngərdə əsgərlərimizin bizi qoruduqları kimi, bu gün həkimlərimiz də mənəvi səngərlərimizdə xalqımızın şərəf və ləyaqətini, namusunu qorumalıdırlar. Biz həkimləri bu sahədə görürük və ümid edirik ki, sağlam həkimlərimiz var və yanlış işlərə imza atmayacaqlar. Xalqımızın övladlarını da yanlış yola yönəltməyəcəklər".

ZAİRA AKİFQIZI

Telegramda izləyin