Milli Məclisin növbəti plenar iclası Şuşada keçirilə bilərmi? - Deputatdan AÇIQLAMA

Xəbər verdiyimiz kimi, aprelin 27-də Şuşada Milli Məclisin daha iki komitəsinin - İctimai birliklər və dini qurumlar və İnsan hüquqları komitələrinin - birgə dinləmələri keçirilib. Bu gün müzakirə olunan məsələlərdən biri də Milli Məclisin plenar iclasının Şuşada keçirilməsidir. Milli Məclisin növbəti plenar iclası Şuşada keçirilə bilərmi?

Bununla bağlı Sonxeber.az-a danışan deputat Cavanşir Paşazadə bildirib ki, Milli Məclisin iclaslarını Şuşada keçirməyimiz qızıl hərflərlə yazılan yeni tariximizin bir hissəsidir:

"2022-ci ilin "Şuşa ili" və Şişanın 2023-cü il üçün "Türk Dünyasının Mədəniyyət Paytaxtı" elan edilməsi bu şəhərin tək bizim üçün deyil, bütün Türk dünyası üçün dəyərli olmasından xəbər verir. 30 ildən sonra bizi cənnət məkanı Şuşamıza qovuşduran Ali Baş Komandana və Müzəffər Azərbaycan ordusuna təşəkkür edirəm".

Deputat Milli Məclisin İctimai birliklər və dini qurumlar və İnsan hüquqları komitələrinin aprelin 27-də Şuşada keçirdiyi birgə dinləmələrdə özünün də iştirak etdiyini vurğulayıb:

"Təbii ki, Şuşaya səfər etmək və orada vacib məsələləri müzakirə etmək ayrı bir məsuliyyətdir. Biz həmin dinləmələrdə Şuşanın tarixən Cənubi Qafqazda tutduğu geostrateji mövqeyindən, Azərbaycanın ictimai-siyasi, mədəni, dövlətçilik həyatındakı rolundan danışdıq. Şuşa tarixən bizim mənəvi dünyamızın, mədəniyyətimizin, dövlətçiliyimizin mərkəzi, qəhrəmanlığımızın simvolu olub. Şuşa həmişə düşmənə sinə gərib, işğalçılar qarşısında sipər olub. Hazırda Azərbaycanın işğaldan azad edilmiş ərazilərində quruculuq işləri həyata keçirilir. Məqsəd həmin torpaqlara qayıdacaq insanlarımızın rahat və firəvan yaşaması üçün bütün imkanların yaradılmasıdır.

Milli Məclisin plenar iclasının Şuşada keçirilməsi məsələsinə gəldikdə isə, təbii ki, belə bir təşəbbüs arzuolunandır. Amma düşünürəm ki, bu barədə danışmaq hələlik tezdir. Əlbəttə, Şuşada bütün quruculuq və bərpa işləri tamamlandıqdan sonra Milli Məclisin plenar iclaslarının bir neçəsini Şuşada keçirmək olar".

Aysel Yusifqızı

Telegramda izləyin