Azərbaycanda ƏDV-nin ləğvi çap mediasına necə təsir edəcək? - AÇIQLAMA

Azərbaycanda kütləvi informasiya məhsullarının, kitabların və dərslik komponentlərinin, həmçinin həmin məhsulların istehsalı və nəşri ilə bağlı kağızın idxalı və satışı əlavə dəyər vergisindən (ƏDV) azad edilib. Bundan sonra kitab, qəzet, jurnal və onların istehsalı ilə bağlı kağız məhsullarının idxal və satışına görə 18 faiz ƏDV tutulmayacaq. 18 faiz ƏDV-nin ləğv olunması çap medianın inkişafına necə təsir edəcək?

Məsələ ilə bağlı Sonxeber.az-a Modern.az saytının redaktoru Əfqan Qafarlı fikir bildirib.
O, Azərbaycanda çap mediasının onsuz da çətin günlər yaşadığını qeyd edib:

"Üstəlik kağız məhsullarının idxal və satışına görə 18 faiz əlavə dəyər vergisinin mövcudluğu vəziyyəti bir az da qəlizləşdirirdi. Qəzetlər üçün reklam bazarındakı məhdudiyyətlər və digər iqtisadi səbəblər, eləcə də qeyd etdiyimiz ƏDV-nin tətbiq olunması bir çox yazılı KİV-ləri – qəzetləri son illər kağız formatından imtina etməyə, elektron varianta keçməyə məcbur etmişdi. Doğrudur, bu məsələdə əsas səbəb təkcə ƏDV ilə bağlı deyil. Amma ƏDV-nin təsiri də az deyildi. Təbii ki, yuxarı maya dəyəri və digər xərclər kitab, jurnal və qəzet satışna mənfi təsir göstərirdi. Kitab oxumaq istəyənlər az deyil. Amma satış qiymətləri qalxa-qalxa gedirdi. Nəhayət çap məhsullarının hazırlanması üçün lazım olan kağızın ƏDV-dən azad edilməsi alqışlanan bir qərardır. Hesab edirəm ki, bu, yazılı mətbuatın inkişafına müsbət təsir edəcək.

Eyni zamanda, nəşriyyatların da işi bir qədər yüngülləşəcək, onların xərcləri müəyyən qədər azalacaq. Bu da son nəticədə kitab, jurnal və qəzet çapında özünü göstərəcək. Ən azı satışda qiymətlər müəyyən qədər azala bilər".
ZAİRA AKİFQIZI

Telegramda izləyin