"Gürcüstanın artıq itirəcək nəyisə yoxdur" - Politoloq

Bildiyimiz kimi, Gürcüstan Ukraynaya açıq dəstəyini bildirib. Belə ki, ölkə prezidenti Salome Zurabişvili Ukrayna ilə bağlı danışarkən bunları deyib: "Biz bilirik və unutmayacağıq ki, Ukrayna bu gün təkcə öz azadlığını, suverenliyini, müstəqilliyini deyil, həm də bizim azadlığımızı və digər Avropa ölkələrinin azadlığını müdafiə edir. Biz təkcə Ukrayna xalqının ağrısını bölüşməyə deyil, həm də onlarla tam həmrəylik nümayiş etdirməyə borcluyuq". Bəs belə bir mövqe Grcüstanla Rusiya arasındakı münasibətlərə necə təsir göstərə bilər?

Bununla bağlı Sonxeber.az-a açıqlama verən politoloq Qabil Hüseynli bildirib ki, bu dəstəyin Gürcüstan və Rusiya münasibətlərinin gərginləşmə prosesinə yenidən ciddi təkan verəcəyi gözlənilmir:

"Gürcüstan və Rusiya münasibətləri gərgin vəziyyətdədir. Gürcüstan bir müddət siyasi manevrlərdən istifadə edərək özünü tərəfsiz göstərməyə çalışsa da, Rusiya əhəmiyyət vermədi.Ukrayna demokratiyaya can atır, liberal cəmiyyət qurmaq istəyir. Gürcüstan Rusiya-Ukrayna münasibətlərində düzgün mövqe tutmağı bacardı.

Salome Zurabişvilinin söylədikləri həqiqətdir. Gürcüstanın təcavüzə məruz qalmış Ukraynaya dəstək verməsinə böyük qiymət verirəm. Artıq Gürcüstanın itirəcək nəyisə yoxdur. Abxaziya əldən gedib. Cənubi Osetiya da Rusiyanın tərkibinə keçib. Dünya cəngəllik qanunları ilə idarə edilmədiyi üçün Rusiyanın Tiflisə də hücum edəcəyini gözləmək olmaz. Rusiyanın Ukrayna ilə müharibədən necə çıxacağı da hələ sual altındadır".

Şəbnəm Lətifi

Telegramda izləyin