7 saylı Cəzaçəkmə Müəssisəsində əfv sərəncamı icra olundu - FOTO-VİDEO

Prezident İlham Əliyevin imzaladığı "Məhkum edilmiş bir sıra şəxslərin əfv olunması haqqında" sərəncamı Ədliyyə Nazirliyinin Penitensiar xidmətinin 7 saylı Cəzaçəkmə Müəssisəsində icra olunub.

Sonxeber.az xəbər verir ki, bu gün həmin məkanda baş tutan tədbiri çıxış nitqi ilə açan 7 saylı Cəzaçəkmə Müəssisəsinin rəisi, ədliyyə polkovnik-leytenantı Rasim Bayramov bildirib ki, Azərbaycan Respublikasın Prezidenti cənab İlham Əliyevin imzaladığı əfv sərəncamı 3 nəfərə şamil olunub, onlardan biri azadlığa buraxılıb, digər iki şəxsin isə cəza müddəti azaldılıb:

"Onlardan biri 1991-ci il təvvəlüdlü Azərbaycan Respublikasının Cinayət Məcəlləsinin 29, 120.2.2 maddəsi ilə 8 il 5 ay 7 gün azadlıqdan məhrum edilən Ağazadə Qəfər Telman oğlunun cəzası tam ləğv edilib, ikisinin cəza müddəti isə azaldılıb. Ulu Öndərin hakimiyyətə qayıdışından sonra bu günə qədər 68 əfv sərəncamı imzalanıb. Hər bir sərəncamın özünəməxsus hüquqi və humanist dəyəri var.

Bu sərəncamlar məhkumların islah prosesinə çox müsbət təsir göstərir. Bu günədək 7 saylı Cəzaçəkmə Müəssisəsində yüzlərlə məhkum imzalanan əfv sərəncamı və amnistiya aktı ilə azadlığa buraxılıb. Mən də öz adımızdan cənab Prezident İlham Əliyevə və Azərbaycanın Birinci vitse-prezidenti, hörmətli Mehriban xanım Əliyevaya təşəkkür edirəm. Bu bayramların azadlığa buraxılan məhbuslar üçün xüsusi dəyəri var. Onlar cənab Prezidentin humanist addımı ilə öz ailələrinə, yaxınlarına və sevdiklərinə qovuşurlar".

Rasim Bayramov qeyd edib ki, 44 günlük Vətən müharibəsində 7 saylı Cəzaçəkmə Müəssisəsində cəza çəkən məhbusların yaxınları da iştirak edib:

"Bu gün əfv sərəncamının şamil olduğu Ələsgər Xuduyevin oğlu da Şuşa uğrunda döyüşlərdə şəhid olub. Dünən cəzasının azaldığını eşidən Ələsgər Xuduyevin sevincinin həddi-hüdudu yox idi.

Bu cür humanist addımlara görə cənab Prezident İlham Əliyevə və Azərbaycanın Birinci vitse-prezidenti, hörmətli Mehriban xanım Əliyevaya bir daha təşəkkür edirəm. Bundan sonra da cənab Prezidentin göstəriş və tapşırıqlarını layiqincə yerinə yetirməyə hazırıq".

Tədbir zamanı Ədliyyə Nazirliyinin Penitensiar xidmətinin Tərbiyə işinin təşkili idarəsinin rəisi, ədliyyə polkovnik-leytenantı Ələkbər Mirzəyev və Ədliyyə Nazirliyi yanında İctimai Şuranın üzvü, Azərbaycan Milli Qeyri-Hökumət Təşkilatları Forumunun prezidenti Zeyni Rauf Xurşud oğlunun iştirakı ilə azadlığa buraxılan məhkuma arayış təqdim olunub və o, azadlığa buraxılıb.

Əfv sərəncamı ilə azadlığa buraxılan Qəfər Ağazadənin anası humanist addımına görə ölkə başçısına təşəkkür edib. O, həmçinin, bu illər ərzində oğluna göstərilən qayğıya görə 7 saylı Cəzaçəkmə Müəssisəsinin rəhbərliyinə də minnətdarlığını bildirib.

Q. Ağazadənin anası qeyd edib ki, oğlunun ziyarətinə gəldikdə burada onu daim yüksək qayğı və diqqətlə qarşılayıblar.

Xatırladaq ki, Prezident İlham Əliyevin mayın 27-də imzaladığı "Məhkum edilmiş bir sıra şəxslərin əfv olunması haqqında" sərəncamla ümumilikdə 213 nəfər əfv edilib.

Belə ki, azadlıqdan məhrumetmə cəzasına məhkum olunmuş 167 nəfər cəzasının çəkilməmiş hissəsindən azad edilib, 1 şəxs ömürlük azadlıqdan məhrumetmə cəzasından azad olunub, 36 nəfərin cəzasının çəkilməmiş hissəsi yarıyadək azaldılıb. Eləcə də azadlıqdan məhrumetmə cəzasına şərti olaraq məhkum edilmiş 3 nəfər cəzadan azad edilib, eyni zamanda azadlığın məhdudlaşdırılması cəzasına məhkum edilmiş 6 nəfər cəzalarının çəkilməmiş hissəsindən azad olunublar.

Bundan başqa, əfv olunmuş 213 nəfərdən biri Özbəkistan, biri İran, biri də Türkiyə vətəndaşı olmaqla 3-ü əcnəbi, 3-ü jurnalist və bloqer, 3-ü siyasi partiya üzvü, 20-si isə 2018-ci il iyulun 10-da Gəncə şəhərində kütləvi iğtişaşlarda iştirak edən şəxslərdir.

Qeyd edək ki, 1995-ci ildən bu günə kimi əfvetmə ilə bağlı 68 fərman və sərəncam imzalanıb, 8 987 məhkum əfv olunub. Bu sərəncamlardan 36-sı Azərbaycan Prezidenti İlham Əliyev tərəfindən imzalanıb və həmin aktlar 5 885 nəfərə şamil olunub.

Aysel Yusifqızı
FOTO: Pərviz Allahverdiyev

Telegramda izləyin