"Bir uşaq belə dilənirsə, bu, böyük problemdir" - Kəmalə Ağazadə

1 İyun Uşaqların Beynəlxalq Müdafiəsi günüdür. Bəs Azərbaycanda uşaq hüquqları necə qorunur?

Bununla bağlı Sonxeber.az-a açıqlama verən Azərbaycan Uşaqlar Birliyinin sədri Kəmalə Ağazadə bildirib ki, ölkəmizdə uşaq hüquqları qorunur, lakin bu işdə cəmiyyət də maraqlı olmalıdır:

"Azərbaycanda uşaq hüquqları həmişə qorunub. Azərbaycanda istər ailə məcəlləsində, istər uşaq hüquqları haqqında qanunda, istər qoşulduğumuz uşaq hüquqları haqqında konvensiyalarda uşaqların mənafeyinin qorunması öz əksini tapıb. Sadəcə bunun icrasında təkcə dövlət qurumları deyil, həm də vətəndaş cəmiyyəti maraqlı olmalıdır.

Paralel olaraq, bu işdə media da böyük rol oynayır. Bir sözlə, ictimai fəallıq olmalıdır və biz illərdir buna çalışmışıq. Çalışmağımızın bəhrəsini də görürük. Mən demirəm ki, bu bəhrə sığınacaq və ya realibitasiya mərkəzidir. Amma artıq elə çağırışlarımız var ki, ailələrin diqqətini yönəldə bilirik.

İllər əvvəl küçə uşaqları çox idisə, indi barmaq sayı qədərdir. Amma cəmi bir fakt belə, olsa, mənim üçün böyük hadisədir. Bir uşaq belə dilənirsə, bu, böyük problemdir. Bir uşaq belə döyülürsə, mənim üçün böyük cinayətdir. Bir uşaq belə zorakılığa məruz qalırsa, zorakılığın növündən asılı olmayaraq, mənim üçün istər valideyn kimi, istər təşkilat rəhbəri kimi böyük faciədir. Çünki mən o uşaqlarla birbaşa işlədiyim üçün onların nə qədər travmalı olduqlarını görürəm və aldıqları travmanı təmizləmək üçün illərlə səy göstərirəm. Təbii ki, bəzən uğursuz məqamlar da olur. Amma biz bu gün işimizi ən çox maariflənmə üzərində qurmalıyıq.

Cinayət xüsusi xalqa mənsub olan bir şey deyil. Cinayətkar hər bir xalqda var. Biz cinayətə gətirib çıxaran səbəblərin qarşısını alaq ki, sayı azalsın. Düzdür, ideal cəmiyyət qurmaq mümkünsüzdür, lakin biz bacardığımız qədər sayı minimuma endirməyə çalışmalıyıq. Fərqli bir xalq olduğumuzu göstərməliyik.

Bundan sonra əminliklə deyək ki, qocamız atılmayacaq, valideynlər uşaqları alçaltmayacaq, atalar uşağa "bic" adı qoyub ondan imtina etməyəcək, atalıq edəcəklər. Kişilər "namus" adı qoyub qadını öldürməsinlər, çünki bundan əziyyət çəkən uşaqlar olur.

Biz bunlar uğrunda mübarizə apardıqca say minimuma enəcək".

Şəbnəm Lətifi

Telegramda izləyin