Hansı xidmətlər icbari tibbi sıgortaya daxildir? - RƏSMİ CAVAB

Bir çox hallarda vətəndaşlar dövlət tibb müəssisələrinə icbari tibbi sığorta ilə müraciət edərkən müəyyən anlaşılmazlıqlarla rastlaşırlar. Belə ki, onların müraciət etdikləri tibbi xidmətin icbari tibbi sığortanın xidmətlər zərfinə daxil olmadığı qeyd edilir.

Bununla bağlı Sonxeber.az İcbari Tibbi Sığorta üzrə Dövlət Agentliyinə sorğu göndərib.

Agetlikdən verilən cavabı olduğu kimi təqdim edirik:

"Vətəndaşlara icbari tibbi sığortanın Xidmətlər Zərfinə daxil olan 2550 sayda tibbi xidmət göstərilir:
 ilkin səhiyyə xidməti - 35
 təcili və təxirəsalınmaz tibbi yardım xidməti - 6
 ixtisaslaşdırılmış ambulator yardım xidmət - 508
 laboratoriya xidməti – 731
 fizioterapiya xidməti – 26
 invaziv radiologiya xidməti – 39
 stasionar cərrahi xidmət - 950
 stasionar terapevtik xidmət – 255

Belə ki, əlillik və ölüm riski olan xəstəliklərin müalicəsi, eləcə də həyati vacib-dəyəri yüksək olan əməliyyatlar Xidmətlər Zərfinə daxildir. Xidmətlər Zərfinə 950-dən çox cərrahi əməliyyat salınıb. Təminata alınmış əməliyyatlar sırasında dəyəri yüksək olan əməliyyatlar əhalinin sağlamlığının və maddi rifahının təmin edilməsi üçün böyük əhəmiyyət kəsb edir. Həmin əməliyyatlar sırasına koxlear implantasiya əməliyyatı, oynaq endoprotezlərin yerləşdirilməsi, aorto-koronar şuntlama əməliyyatı, anevrizma əməliyyatları, anadangəlmə ürək qüsurlarının cərrahi müalicəsi, eləcə də minimal invaziv üsulla həyata keçirilən kardiocərrahiyyə əməliyyatları (koronar stentlərin taxılması) daxildir. Bahalı əməliyyatlar sırasında həmçinin kifayət qədər geniş sayda oftalmoloji, travmatoloji, uroloji və neyrocərrahiyə əməliyyatları vardır.
Xidmətlər Zərfinə daxil olan tibbi xidmətlərin siyahısı və tarifləri ilə Agentliyin rəsmi internet səhifəsində tanış ola bilərsiniz: https://its.gov.az/page/xidmetler-zerfi-3

İcbari tibbi sığortanın Xidmətlər Zərfi çərçivəsində vətəndaşlara tibbi xidmətlər Tibbi Ərazi Bölmələrini İdarəetmə Birliyinin (TƏBİB) tabeliyində olan dövlət tibb müəssisələrində (https://its.gov.az/files/9/TEBIB%20SIYAHI.pdf) göstərilir.

TƏBİB-in tabeliyində olan dövlət tibb müəssisələrində müvafiq xidmətin göstərilməsi mümkün olmadığı təqdirdə vətəndaşa Agentliyin müqavilə bağladığı 57 özəl tibb müəssisələrindən birinə (https://its.gov.az/uploads/law/118/829126.pdf) göndəriş verilir. Vətəndaş TƏBİB-in tabeliyində olan dövlət tibb müəssisəsi tərəfindən verilən göndəriş vərəqəsi əsasında müqaviləli tibb müəssisəsinə müraciət etdikdə Xidmətlər Zərfi çərçivəsində tibbi xidmətlərdən ödənişsiz yararlanır. Bu halda müvafiq tibbi xidmətin dəyəri müqaviləli tibb müəssisəsinə İcbari Tibbi Sığorta üzrə Dövlət Agentliyi tərəfindən ödənilir.

Vətəndaş TƏBİB-in tabeliyində olan dövlət tibb müəssisəsi tərəfindən göndəriş vərəqəsi almadan birbaşa müqaviləli tibb müəssisəsinə müraciət edərsə, tibbi xidmətin dəyərini tam həcmdə öz vəsaiti hesabına ödəməlidir. Qeyd edək ki, müqaviləli tibb müəssisələrinin sayı mütəmadi olaraq yenilənir".

AYSEL QULİYEVA

Telegramda izləyin