"Şuşa bəyannaməsi ilə Azərbaycan Vətən müharibəsində əldə etdiyi zəfərini qaranti altına aldı" - Naqif Həmzəyev

Sabah, yəni iyunun 15-də Şuşa Bəyannaməsinin imzalanmasının birinci ildönümüdür.

Bununla bağlı Sonxeber.az-a açıqlama verən deputat Naqif Həmzəyev bildirib ki, Şuşa bəyannaməsi bizim üçün çox böyük imkanlar yaradacaq, bu günə kimi əldə etdiyimiz imkanların on qatının şahidi olacağıq:

"15 iyun Azərbaycan üçün çox önəmli gündür. Azərbaycanın Milli Qurtuluş günü olmaqla yanaşı, həm də Şuşa bəyannaməsinin imzalandığı gündür. Şuşa bəyannaməsinin imzalanması ilə Azərbaycan Vətən müharibəsində əldə etdiyi zəfərini qaranti altına aldı. Türkiyə-Azərbaycan münasibətlərində yeni səhifə açıldı, eyni zamanda bu münasibətlər strateji müttəfiqlik səviyyəsinə çatdı. Tək hərbi sənayedə deyil, ümumiyyətlə bütün sahələrdə birgə inkişafın koordinasiyalı fəaliyyətinin təşkil edilməsi üçün Şuşa bəyannaməsinin çox böyük önəmi var.

Ötən ildən Azərbaycan Qarabağ və Şərqi Zəngəzurda sürətli quruculuq işlərini həyata keçirməkdə və türk şirkətləri Azərbaycana bu prosesdə dəstəyini göstərməkdədir. Ən qısa zamanda Qarabağ və Şərqi Zəngəzurda infrastruktur layihələri həyata keçirildi, zəfər yolu inşa edildi, Qarabağ və Şərqi Zəngəzur elektrik enerjisi ilə təchiz edildi və hələ də bu proses davam etdirilməkdədir. Həmçinin Füzuli aeroportunun da açılışının şahidi olduq . Bu açılışda Türkiyə prezidenti Rəcəb Tayyib Ərdoğan iştirak etdi. Daha sonra Azərbaycanda keçirilən Teknofestdə də Rəcəb Tayyib Ərdoğanın iştirak etməyi Türkiyə-Azərbaycan münasibətlərinin günü-gündən daha da inkişaf etdiyinin bariz nümunəsidir.

Ümid edirik və inanırıq ki, Şuşa bəyannaməsi bizim üçün çox böyük imkanlar yaradacaq. Bu günə kimi əldə etdiyimiz imkanların on qatının şahidi olacağıq. Türkiyə-Azərbaycan münasibətlərini artıq Avropa da qəbul edir. Xüsusilə Avropanın enerji təhlükəsizliyində Azərbaycan və Türkiyənin əvəzolunmaz iştirakı və önəmi günü-gündən artır. Bu baxımdan Şuşa bəyannaməsi yeni dünya düzənində öz müsbət xeyrini Azərbaycana və Türkiyəyə verəcək".

Şəbnəm Lətifi

Telegramda izləyin