Bir həftəlik harada və nə qədər büdcə ilə dincələ bilərik?

Yay mövsümü olduğu üçün insanlar həm ölkəmizin müxtəlif bölgələrinə, həm də xarici ölkələrə üz tutur. Kimisi şəxsi avtomobili ilə, kimisi isə turlarla səyahət edir. Bəs 1 ailənin rayonda və ya xarici ölkələrdə istirahət etməsi neçəyə başa gəlir?

Mövzu ilə bağlı Sonxeber.az saytına turizm üzrə mütəxəssis Sürəyya Axundova fikirlərini bölüşüb.

O bildirib ki, Azərbaycanda həm ucuz, həm lüks istirahət mövcuddur:

"2 nəfərin bir həftəlik rayonlarda dincəlməsi minimum oteldə qalmaq, qidalanma daxil 900-1000 manat arası dəyişir. Təbii ki, rayonlara görə bu qiymətlər dəyişir. Quba, Qəbələ, Şamaxı bölgəmizdə qiymətlər yüksəkdirsə, Lerik,İsmayıllı,Şəkidə qiymətlər daha münasibdir.

Lüks yerlərdə 1 həftəlik 2 nəfərlik istirahət 1500-2000 arasıdır.

Rayonlara səfər zamanı qarşılaşdığımız problemlər də var. İlk öncə yolların təmirsiz, xidmətin nisbətən zəif olması ürəkaçan deyil.

Xarici turlar üçün də kifayət qədər müraciət edənlər var. Ən çox Gürcüstan, Türkiyə və Avropaya səfər edirlər. Quru sərhədlər bağlı olduğundan qiymətlər hazırda nisbətən bahadır. Təbii ki, quru yollar açılarsa, qiymətlər daha münasib olacaq.

Bir ailənin bir həftəlik Türkiyəyə səfəri 2900 dollar civarında hesablanırsa, Gürcüstanda isə bu təxmini 1700 manat civarındadır. Müxtəlif kampaniyalar olarsa, qiymətlər hər zaman dəyişə bilər".

Xoş istirahətlər.
AYSEL QULİYEVA

Telegramda izləyin