"PARAZİT CÜTLÜYÜ" QAZAXISTANDAN NƏ İSTƏYİR? – Və Keosayanın adı niyə terrorçular siyahısına salınıb?

"Mən mütləq Qazaxıstana gedəcəyəm və bunun üçün Qazaxıstan hakimiyyətindən icazə almayacağam. O an gələcək və mən mütləq böyüdüyüm doğma, sovet Qazaxıstanına gedəcəyəm".

Bunları Kremlin əsas təbliğatçılarından olan Marqarita Simonyanın əri Tiqran Keosayan Rusiya mətbu orqanlarından birinə açıqlamasında deyib.

Keosayanın bu sözləri söyləməsinə səbəb Qazaxıstan hakimiyyətinin onun ölkəyə girişinə qadağa qoymaqla yanaşı, adını terrorçularla eyni siyahıya salmasıdır. Qazaxıstanın bu addımı isə təsadüfi deyil. Məlum olduğu kimi, Keosayan bir müddət əvvəl Qazaxıstanla Rusiya arasında siyasi gərginliyə səbəb olan təxribat və hədə-qorxu mesajları ilə çıxış etmişdi. Simonyanın əri Rusiyanın ətrafındakı ölkələrin tərəf seçməli olduğunu deyib və birmənalı olaraq Rusiyanı dəstəkləməyənlərin düşmən elan edilməli olduğunu bildirib. Erməni əsilli "rus vətənpərvəri" Moskvanın Qazaxıstan hakimiyyətini xilas etdiyini, əvəzində isə bu ölkədə 9 may "Qələbə paradı"nın təxirə salınmasını satqınlıq kimi qələmə verib: "Ukraynaya diqqətlə baxın, ciddi düşünün. Düşünürəm ki, bizim səlahiyyətli şəxslərin də (Qazaxıstanla-red.) əlaqələrin səviyyəsini yenidən qiymətləndirməsi lazımdır". Həmin vaxt Qazaxıstan Xarici İşlər Nazirliyinin sözçüsü demişdi ki, Keosayanın bu fikirləri "Qazaxıstanla Rusiya arasındakı münasibətlər atmosferini zəhərləməyə" xidmət edir. O, həmçinin Keosayanın Qazaxıstana girişinə qadağa qoyulacağını və onun adının "arzuolunmaz şəxslər" siyahısına salınacağını bildirmişdi. Bugünlərdə isə məlum olub ki, Keosayanın adı nəinki "arzuolunmaz şəxslər", hətta terrorçular siyahısına salınıb.

Maraqlıdır ki, Qazaxıstan Prezidenti Kasım Jomart-Tokayev də son Sankt-Peterburq Beynəlxalq İqtisadi Forumunda Keosayanın arvadı Simonyanın Qazaxıstanın mövqeyilə bağlı eyni məzmunlu sualları ilə qarşılaşıb. Simonyanın suallarına kifayət qədər sərt və birmənalı cavablar verən Tokayev ölkələrin ərazi bütövlüyünün toxunulmazlığının tərəfdarı olduğunu söyləməklə yanaşı, ad çəkmədən Keosyanın da açıqlamalarını sərt şəkildə pisləyib.

Ancaq göründüyü kimi, Qazaxıstan cəmiyyətinin və ölkə başçısının bütün bu narazılıqlarına, təpkilərinə rəğmən Keosayan yenə başından böyük təxribatçı açıqlamalarını dayandırmır. Onun "nə vaxtsa sovet Qazaxıstanına qayıdacağına" dair söylədikləri də Rusiyanın işğalçılıq planlarının və bununla bağlı apardığı təhdid və hədə-qorxu siyasətinin tərkib hissəsidir. Təbii ki, Kremlin "hürdürdüyü" heç kimdə şübhə doğurmayan bu varlığın həm Qazaxıstanı Ukraynanın gününə qoymaqla hədələməkdə, həm də gələcək "sovet Qazaxıstanı" barədə danışmaqda əsas məqsədi ona verilən sifarişləri yerinə yetirməkdir və bütün bunlardan sonra təbii ki, Qazaxıstan haqlı olaraq onu terrorçularla eyni sırada görür.

Ümumiyyətlə, Simonyan-Keosayan cütlüyünə Rusiyanın hələ də ağlı başında olan ziyalılarının, siyasətçilərinin, incəsənət və mədəniyyət xadimlərinin münasibəti olduqca mənfidir. Onlara ən düzgün və layiqli adı isə Rusiya müxalifətinin lideri sayılan Aleksey Navalnı verib: "Parazit cütlüyü"!

Rusiyalı jurnalist Slava Taroşina isə bu ailə ilə bağlı deyib: "Simonyan-Keosayan ailə tandeminin əmələ gəlməsindən sonra Rusiya təbliğatı özünün son cizgilərini cızmış oldu – "hər şey etmək olar, heç nə ayıb deyil""./AzPolitika.info

Telegramda izləyin

instagramda izləyin