"Avtobusların sayının artırılması həll yolu deyil" - Mais Ağayev

Avtobusların 15-20 dəqiqədən bir hərəkət etməsi sərnişin sıxlığına səbəb olur. Nəticədə sərnişinlərdə psixoloji gərginlik yaranır və avtobuslarda dava halları çoxalır.
Bununla bağlı Sonxeber.az-a açıqlama verən Bakı Nəqliyyat Agentliyinin sözçüsü Mais Ağayev bildirib ki, problemin həll yolu avtobus zolaqlarının artırılmasıdır:
"Bu barədə biz özümüz də məlumat veririk ki, sərnişinlər avtobusların hərəkətində müəyyən çətinlik olduğunu bilsinlər. Bu çətinliklərin olmaması, müəyyən olunmuş interval üzrə hərəkətə nail olmaq üçün ən optimal həll yolu avtobus zolaqlarının əhatə dairəsinin genişləndirilməsi və eyni zamanda onlara nəzarətin gücləndirilməsidir. Digər sürücülərin avtobus zolağının tələbinə uyğun hərəkət etməməsi nəticəyə nail olmağa imkan vermir. Avtobusların sayının artırılması həll yolu deyil. Əgər yolda tıxac varsa, avtobus sayını artırmaqla tıxacda qalan nəqliyyat vasitəsinin sayını artırmış olarıq. Çünki həmin avtobuslar da tıxacda qalacaqlar. Amma avtobusların önü açılsa, digər nəqliyyat vasitələri daxil olmasa, avtobus rahat hərəkət edəcək, interval da müəyyən olunmuş 5-6 dəqiqə arasında dəyişəcək".
Şəbnəm Lətifi

Telegramda izləyin