EHTİYATLI OLUN: Yerdən pulu götürən kimi dili tutuldu, xəstəxanalıq oldu - FOTO

ABŞ sakini Rene Parsons yerdən pul götürdükdən sonra dili tutulub və xəstəxanalıq olub.

Sonxeber.az BiG.AZ-a istinadən xəbər verir ki, bu barədə "New York Post" yazır.

Belə ki, hadisə qadın həyat yoldaşı Castin ilə Dallasda konfransa yollandığı zaman baş verib. Yolustü cütlük "McDonald's"da yemək qərarına gəlib. Burada, yerdə pul görən Rene onu düşünmədən götürüb. Lakin bir neçə dəqiqədən sonra onun dili tutulub. Qadın gəzmək və nəfəs almaqda çətinlik çəkib.

"Mən çiyin nahiyəsindən başlayıb aşağıya doğru artan yanğı hiss etdim. Nəticədə, bütün bədənim keyidi", - deyə Rene izah edib.

Castin isə baş verənləri belə xatırlayır:

"Əvvəlcə o, heç nə demədi, sonra çox təəssüfləndiyini dedi, mənə sevgi etirafı edib susdu. Onun rəngi qaçmışdı, sanki ölürdü".

Huşunu itirməzdən öncə Parsons pulu götürdüyü əli ilə yoldaşına toxunub. Bu toxunuşdan sonra kişinin də dodaqları keyiyib, əlində isə səpkilər əmələ gəlib.

Vəziyyətdən qorxuya düşən Castin dərhal xəstəxanaya yollanıb. Burada qadına təcili yardım göstərilib və 4 saat sonra simptomlar zəifləməyə başlayıb.

Castin hesab edir ki, pula fentanil (opioid analgetik maddə) sürtülüb, lakin xəstənin analizlərində bu narkotik maddə aşkarlanmayıb. Pulun üzərində də polis fentanil izinə rast gəlməyib.

Buna baxmayaraq, Parsons əmindir ki, onun bədəninə puldan keçən narkotik maddə təsir edib. Qadın insanları diqqətli olmağa və digərlərinin pulunu yerdən qaldırmamağa çağırıb.

Telegramda izləyin