"Dünya artıq ermənilərin "timsah göz yaşları"ndan bezib" - Deputat

"Sentyabr ayının 12-dən 13-ə keçən gecə 50 vətən övladının şəhid olması ilə bağlı dərin hüznlə kədərləndiyimi bildirir, Allahdan rəhmət diləyir, doğmalarına səbir arzulayıram".

Bu sözləri Sonxeber.az-a danışan deputat Nəsib Məhəməliyev deyib.

Deputat qeyd edib ki, Ermənistanın Laçın və Kəlbəcər rayonlarını atəşə tutmasının əsas səbəbi müharibədən sonra üzərinə götürdüyü öhdəlikləri icra etmək istəməməsidir:

"Hər bir hadisəyə obyektiv qiymət vermək üçün həmin hadisənin motivlərinə diqqət çəkmək lazımdır. Son Brüssel görüşünün qərarında deyilir: hər iki ölkənin xarici işlər nazirlərinə tapşırılır ki, bir ay müddətində sülh müqaviləsinin mətni üzərində iş aparılsın. Sərhədlərin delimitasiya, demarkasiya məsələlərinə, kommunikasiyaların bərpasına başlanılsın. Təbii ki, bu razılaşmalar Azərbaycanın daha əvvəl irəli sürdüyü 5 prinsipə uyğundur və bizi qane edir. Əlavə olaraq, Prezident İlham Əliyev humanist jest etdi və 5 erməni əsirini Ermənistana qaytardı.

Sonra nə baş verdi? Paşinyan Azərbaycanın xeyirxah addımını qiymətləndirmək əvəzinə, Vladivostokda keçirilən iqtisadi forumda mövqeyini 180 dərəcə dəyişdi".

Deputat vurğulayıb ki, Şarl Mişelin vasitəçiliyi ilə növbəti, beşinci görüş noyabr ayında keçirilməli idi:

"Əvvəlki görüşlərin nəticələrinə görə, Paşinyan başa düşür ki, nizamlanma proseslərində Avropa İttigaqı ilə Azərbaycanın baxışları üst-üstə düşür. Azərbaycan tərəfinin mövqeyi beynəlxalq hüquqa, ədalətə söykənir. Hətta ən qərəzli, ermənipərəst təşkilatlar belə, bunu inkar edə bilməz. Belə olan halda Ermənistanın manevr imkanları qalmır və ölkəsi faktlar qarşısında aciz vəziyyətdədir. Ona görə də diqqəti əsas məsələdən yayındırmaq üçün çıxış yolunu genişmiqyaslı təxribatlarda gördülər.

Əfsuslar olsun ki, 50 nəfər igidimiz şəhid oldu. Ancaq Müzəffər Ordumuz onların intiqamını artıqlaması ilə aldı. Düşmənin yüzlərlə canlı qüvvəsi, hərbi bazaları məhv edildi, əsir götürüldü. Havadan Müdafiə Sistemləri, ağır texnikası, müxtəlif çaplı silahları sıradan çıxarıldı, müdafiə infrastrukturu darmadağın edildi.

Düşmən növbəti dəfə Azərbaycan ordusunun, Azərbaycan silahının gücünü gördü. Məhz bunun nəticəsidir ki, Ermənistan gah KTMT-yə, gah BMT-yə, Makrona, bütün beynəlxalq təşkilatlara, böyük dövlətlərə yalvarmağa başladı ki, guya Azərbaycan hücuma keçib, erməniləri xilas etsinlər. Görünən odur ki, dünya artıq ermənilərin "timsah göz yaşları"ndan bezib.

Baş verənlər onu göstərir ki, müharibədən iki il keçməsinə baxmayaraq, Ermənistan tərəfi ağıllanmır və təxribatlardan əl çəkmir. Hər vasitə ilə vaxt qazanmaqla, yenidən toparlanmağı və revanş götürməyi planlaşdırır. Ona görə də biz onların törətdikləri vəhşilikləri unutmamalıyıq: istənilən təxribatlara onqat cavab verilməli, düşmənçilik hərəkətləri rüşeym halında məhv edilməlidir".

Aysel Yusifqızı

Telegramda izləyin