"Torpaqlarımızı azad edən Müzəffər Ordunun qurucusu məhz Heydər Əliyevdir"-Deputat

"Ulu Öndər Heydər Əliyev 1990-cı ilin 20 yanvar hadisələrində Moskvada SSRİ rəhbərliyini açıq şəkildə tənqid edib, mətbuat konfransı keçirərək Bakıda baş verənləri dünya birliyinə çatdırıb,1993-cü ilin iyununda vətəndaş müharibəsinin, separatçılığın qarşısını alıb və Azərbaycanı parçalanmaqdan xilas edib".

Bu sözləri Sonxeber.az-a açıqlamasında deputat Nəsib Məhəməliyev deyib.

Deputat qeyd edib ki, ilk müstəqil konstitusiyamız onun bilavasitə rəhbərliyi ilə qəbul edilib, bugünkü güclü iqtisadiyyatımızın əsasını təşkil edən, əsrin neft kontraktları imzalanıb, hüquqi dövlət qurulub, cəmiyyətin bütün sahələrində islahatlar aparılıb:

"Azərbaycanda yaşayan bütün xalqları öz ətrafında birləşdirən Azərbaycançılıq ideologiyasının banisi, işğal altında olan torpaqları azad edən Müzəffər Ordunun qurucusu məhz Heydər Əliyevdir. Azərbaycanı beynəlxalq miqyasda tanıtdıran, müxtəlif xarici ölkələrdə yaşayan soydaşlarımızı bir araya gətirməklə diaspor təşkilatlarının əsasını qoyan və dünya azərbaycanlılarının həmrəylik gününü rəsmi dövlət bayramı olaraq təqvimə yazdıran Heydər Əliyevdir.

Bir sözlə, Ümummilli liderin Azərbaycan dövləti qarşısındakı xidmətləri sonsuzdur və illər ötdükcə, dünyada baş verən hadisələri təhlil etdikdə onun dahiliyi daha qabarıq şəkildə özünü göstərir. Azərbaycan xalqı hər zaman öz xilaskarını dərin minnətdarlıq hissi ilə xatırlayacaq. Ona görə də 2023-cü ilin "Heydər Əliyev ili" kimi qeyd olunması bir vəfa borcudur və hər kəsin ürəyincədir".

Aysel Yusifqızı

Telegramda izləyin