"Zəfər münasibəti ilə Azərbaycan Prezidentini, ordumuzu alqışlayanlar bu gün erməniləri müdafiə edirlər" - Deputat

"Dövlətimizin başçısı cənab İlham Əliyevin şəhidlərimizin Anım Gününü Füzulidə qeyd etməsi və Birinci vitse-prezident Mehriban xanım Əliyeva ilə birlikdə Azərbaycan əsgərinin ilk hücuma keçdiyi yerləri ziyarət etməsi qəlbimizi qürur, fəxarət hissi ilə doldurdu".

Bu sözləri Sonxeber.az-a danışan deputat Jalə Əhmədova deyib.

Deputat qeyd edib ki, cənab Prezident həmişə belə olub:

"Ali Baş Komandan Azərbaycan xalqının ən çətin günlərində yanında olub və bununla da vətəndaşlarına tək olmadıqları mesajını verib. O, Füzuli rayonunun Qaraxanbəyli kəndinin yaxınlığında şəhidlərimizin şərəfinə ucaldılmış abidəni ziyarət edərkən Azərbaycan əsgərinin məhz buradan hücuma keçdiyini, igid əsgər və zabitlərimizin burada şəhid olduğunu bildirib. Davamlı olaraq Qarabağa səfər edən cənab Prezidentin məhz Anım Günü bu bölgəyə səfər etməsini xüsusi vurğulamaq lazımdır. Gəlin biz də öz vətəndaşlıq borcumuzu dərk edərək addım ataq".

Deputat vurğulayıb ki, son erməni təxribatlarında ölkəmizi ittiham edən, özlərini müxalifətçi adlandırıb erməni "dəyirmanına su tökən"lərə uymamaq lazımdır:

"Çünki belələrinin yaddaşı çox "zəif"dir, dünən dediklərini bu gün təkzib edirlər. Zəfər münasibəti ilə Azərbaycan Prezidentini, ordumuzu alqışlayanlar bu gün erməniləri müdafiə edirlər.

Odur ki, bir çox xarici qüvvələrin, eləcə də "sapı özümüzdən olan baltalar"ın karına gələn addımlardan uzaq olmalı, hər bir addımımızı yüz ölçüb, bir biçməliyik. Hər zaman vətəndaşının yanında olan dövlətimizin başçısının ətrafında sıx birləşməli və 44 günlük Vətən müharibəsində olduğu kimi, milli birlik və həmrəylik nümayiş etdirməliyik".

Aysel Yusifqızı

Telegramda izləyin